U nongaiktien ka BJP, u Mariahom Kharkrang u haba kren sha ki lad pathai khubor u la ong ba ka BJP ka la iaid bakla ha kane ka elekshon shiteng samoi kaba dang shu dep ha Gambegre.
“Ngin sa wad ia kaei kaba la bakla bad lehse ngin hap ban pynkylla ia ka buit jong ngi kumno ngi ialap elekshon hangne ha jylla namar man ka por ba don ka elekshon, la ialehkai ia ka niam bad mynta ngi hap ban ialeh pyrshah ia kata”, la ong u Kharkrang.
U nongaiktien ka BJP u la ong ba ha ka elekshon sha ka iing dorbar thawain jong u snem 2023 ka party ka la pyrshang ban leh ia kata hynrei ka dang don shibun kiei kiei kiba dang dei ban leh.
U la ong ba baroh ki nongialam ba rangbah jong ka seng kin shong bad peit bniah kiei ki jingduna bad ki lad pynbeit kin hap ban shim shwa ka elekshon ban wan.
U Bah Kharkrang u la ong ba haba peit ia ka rukom treikam jong ka seng ka don shibun kiei kiei kiba dang donkam ban leh.
U la ong ruh ba lada uwei u kren kin mynjur ba lada ka sorkar BJP ka don ha ka jylla ka roi ka par kan sa wan.
“Ki la ïanujor ïa ka rukom kiew jong ka jylla jong ngi bad kiwei pat ki jylla hynrei haba ka poi ha ka por ba kut jong ka samoi treikam ne tang shwa ka tarik elekshon te ka niam ka wan ha ka dur. Kumta kane ka la jia la slem bah bad na ka bynta ka elekshon ban wan ngi hap ban pynkhreh kumno ban ïakhun pyrshah ïa kane,” ong u nongaiktien ka BJP.
Lah ban kdew ba u kyrtong ka BJP u Bernard Marak u la ioh tang 710 vote .