Hadien ka jingkhlad ki ar ngut ki khynnah Khasi, ha ki ar tylli ki Rehabilitation Center kiba don ha Assam, ba la pyniaid da u Arup Passah bad ka jingmih shakhmat ki katto katne ki samla ban kynnoh halor ka jingshah pynshitom jong ki ha u nongpyniaid kine ki jakasumar, kaba wanrah ruh ka jingshah kynnoh ha ki rynsan social media pyrshah ia ki Hynniewtrep Youth Council (HYC), ka seng kaba la iarap ia ki samla ban phah sumar ha kine ki Rehabilitation Center, ha ka 25 Tarik Naiweing 2024 , u nongialam ka HYC u la pynshai da kaba ong ba ka jingshah kynnoh ka seng ka dei na ka jinglong mawjynthud ia ki katto katne ngut ki ba kamai spah na u drok.
Haba kren sha ki ladpathai khubor, u Bah Roy Kupar Synrem, u la ong ba ka seng ka la sdang ia ka jingkynra drok mynta la 6-7 bnai bad haba ka la ioh ban kem ia ki nongdih drok ka ju iasyllok bad ki ha ryngkat ki bahaïing ba kin im noh da ka jingim ba thymmai. Kum ka sienjam ban iarap ia ki samla ka seng ka iarap ia ki da kaba leit buh ia ki sha ki rehabilitation center kaba don ha Assam da ka jingmynjur lang na u nongdih drok bad ki bahaïing jong u.
“Na ki 160 ngut kiba ka seng ka lap kim dei kiba shah kem lut ha ka seng hynrei ki dei kiba la wan ialam hi da ki kmie ki kpa jong ki hi ban pan jingiarap na ka Seng ba kin ioh ka jingsumar bad phah ruh ban soi ia ka kot ha shwa ba kin phah sumar, kane ka long ba kam don ka jingphah jubor ia ki ba kin phah sumar ha ki rehabilitation center” ong u Bah Kupar.
U Bah Roy Kupar Synrem u la ong ba ka seng ka kyntait ia ka jingkynnoh ba ka HYC ka leit sha surok ban kem ia ki nongdih drok bad ka phah jubor justi sha ki jaka sumar.
“Nalor kane ka Seng ha shwa ban phah sumar ia ki nongdih drok sha kane ka jaka ngi la leit ruh ban jurip ia kine ki jaka sumar, bad lap ruh ba bun na ki nongtrei ha kane ka jaka sumar ki dei ki Khasi ba ngi la leit ruh ban kylli na kiba shah sumar ha kane ka jaka bad shem ba ka biang lut nadong shadong hi, kumta na ka liang ka seng ka sngewba ka biang ban phah sumar ha kane ka jaka” u la ong.
Halor ka jingkynnoh ioh Pisa, ka Seng ka la pynshai ba lada ki leit buh ia ki nongdih drok sha kine ki Rehabilitation center, u Bah Roy u la ong ba na ki 160 ngut tam ba ka seng ka la phah ki don kiba wan na ka longïing kaba duna ka ioh ka kot bad ki bym lah ban siew wat tang shityngka ruh ia ka jingsumar, hynrei da ka jingkyrpad ki bahaïing ka seng ha ka jingsngewsynei ka la iakren ia ki nongpyniaid ka Rehabilitation center bad ki pdiang ia kane ban sumar ia ki.
“Na ka liang ka seng ka ju lum ia ki marbam mardih kiba la ai sngewbha da kiwei pat ki briew bad leit ban ai sha kane ka jaka sumar kaba ki khun samla na ka Jylla ki don ban phah sumar ban long ka jingiarap” u la ong.
“Ban iarap ia ki nongdih drok hi ka bun ka jinglut na ka seng ban ka jingioh namar hap ban leit shaw leit buh ia ki.
Kine baroh ki jingkren ki dei tang ki jingpyrshang ban ïalam bakla ia ki paidbah bad khamtam namar ba ka la wanrah jingthud ia ki briew kiba kamai spah na u drok” u la bynrap .
U Bah Roy u la ong ruh ba kine ki jingkynnoh pyrshah ia ka seng ka mih namar ba ka jingkurup drok ka seng ka wanrah ia ka jingduhnong ia kiba bun kiba kamai spah na ki nongdih drok, wat kine ki jingjia na ka liang ka seng hi ka kren da ka ba shai ba kan dang bteng ban iakhun pyrshah ia u drok bad ban ai jingiarap sha ki nongdih drok.