Ka Khun Hynniewtrep National Awakening Movement (KHNAM) hynne ka sngi ka 26 tarjk Naiwieng 2024 ka la leit ia kynduh ia u Dy CEM ka KHADC ban ym ailad ia ki riewlum Garo ban long kum ki Rangbah Shnong ha Raid Marwet kaba hap hapoh ka Hima Mylliem.
Haba kren bad ki nongthoh khubor hadien ka jingiakynduh bad u Deputy CEM u Working President ka KHNAM u bah Thomas Passah u la ong ba ha ka bynta jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007 ka la kren shai ba tang ki Khasi kiba lah ban bat kum ki Rangbah Shnong.
Na ka liang u Bah Passah u la kyntu ia ka KHADC ban shim da ki lad ki lynti kiba tyngeh ia kine ki self-styled Garo Rangbah Shnong kiba dei ki Shnong kiba don ha ki thaiñ khappud kiba hap hapoh ka Raid Marwet jong ka Hima Mylliem.
Kat kum ka jingiathuh jong u bah PN Syiem kine ki Shnong kiba hap hapoh ka Raid Marwet ki dei ki bym don ki Khasi kiba shong basah. U bah Passah u la bynrap da kaba ong ba na ka liang ka jong ki, ki la ai jingmut ia ka KHADC ban thung da u Myntri u ban long ruh kum u Rangbah Shnong ha kine ki Shnong ki bym don Khasi.
U bah Passah u la iathuh ruh ba ki la kyntu ia ka KHADC ban pan da ka kaiphod na ka Hima Mylliem halor ka jingiadie ia thied jaka ha kine ki Shnong kiba hap hapoh ka Raid Marwet ha kine ki san snem.