Ka Klob Shillong Lajong FC kaba dei ruh ka kynhun kaba khlaiñ tam ha kane ka samoi bad kaba dang shong ruh ha ka kyrdan ba hakhlieh tam jong ka miej ïakheiñ poiñ mynta ka aiom, ka la mad ia ka nam rem kaba nyngkong hadien ka jingiakhun pyrshah ia ka Nangkiew Irat hynne ka sngi ka 27 Naiwieng ha madan SSA stadium Polo, Shillong.
Ha katei ka jingiakhun ka Lajong ka khlem poi pyrkhat ha kaba ka la liem noh da 2-1 kol. Naduh ka kylla step ka Nangkiew ka la ioh ban pynkhih jar nyngkong tang hapoh 13 minit lyngba u Damehun Syih. Katba ka jingiakhun ka dang bteng, ka Lajong ka la ioh ban pynphai ia katei ka shi kol ha ka minit ba 33 lyngba u Deibormame Tongper hynrei watla ki la ïakhun tyngeh ban pynneh ia ka kyrdan, ki rangialehkai ka Nangkiew ki la khang lad ban pynduh noh ia ka jingangnud jong ka Lajong.
Hadien ba bteng ka kylla miet, ka Nangkiew ka la ioh ban khyrwit sa shi kol lyngba u Jefferson Pakyntein ha ka minit ba 88 bad lah ban ong ba lyngba katei ka kol, ka Nangkiew ka la ioh ia ka jingtikna ban khur ia ka jingjop ba 2 mynta ka samoi.
Lyngba katei ka jingjop, ka Nangkiew Irat ka la ioh ia ka kabu ban kiew ha ka kyrdan ba 8 katba ka Lajong ka la tikna ban hiar ha ka kyrdan ba ar hadien 5 tylli ki jingïalehkai.
