Mynta ka sngi ka 27 Naiwieng 2024, u Myntri Rangbah ka jylla Conrad K. Sangma u la plie pyrda ia ka bynta ne ka wat ba nyngkong (phase 1) jong ka Meghalaya Biological Park, ia kaba la tip ruh kum ka Meghalaya Zoo ha Umtrew, Ri Bhoi District.
Ha katei ka jingialang la don ryngkat ruh u Bah A.L.Hek, Bah D.P. Wahlang IAS, Bah Celestine Lyngdoh uba dei ruh u MLA ka thaiñ, James P.K. Sangma, S.M Sahai IFS, R.S. Gill IFS, Sampath Kumar IFS, ki Nongïalam Shnong, ki riew Rangbah bad kiwei kiwei.
Haba ai jingkren ha kane ka sngi, u Myntri Rangbah u la ong ba ka Sorkar Jylla ka la shim ia ka sienjam kaba heh ban ïakhun kumno ban tyngkai ia ki jingdon ba kyrpang, ki jingdon kiba la hiar pateng bad kiba la rim ka jylla.
U la ban ruh ba la pyndonkam da ki bor ka juk mynta kum ki drone ban peit pyrman bad ban pynneh ia ka jingitynnad bad kiar na kaba pynduh jait ia kiei kiei kiba la long tynrai lypa.
U Myntri Rangbah u la pynshai bniah ba ka thong jong ka Meghalaya Zoo ka long ban pynioh ia ka jingtip ba tikna na ka bynta ki nongjngohkai pyrthei shaphang ki mrad khlaw, ki dieng ki siej bad baroh ki jingitynnad kiba ker sawdong ha ka jylla. U la ong ruh ba kadei kawei na ki thong ban ai mynsiem ia pateng kumno ban tyngkai ia kine kiei kiei kiba la long tynrai kiba long ruh ka spah jong ka Jylla.
