U Nongrwai ba paw ka pyrthei na ka Ri England, u Ed Sheeran un sa wan ban rwai ha ka Nongbah ha ka 12 Rymphang 2025. Katkum ka jaka ba la pynskhem, une u Nongrwai uba la 33 snem un sa ioh ia ka kabu ban rwai ha madan Jawaharlal Nehru Stadium, Polo Shillong.
Lyngba ki rynsan Social media, na ka liang u Ed, u la pynpaw ia ka jingkmen ban wan rwai biang ha India “ban wanphai biang ha India na ka bynta ka tour jong nga sha ka ri ba itynnad jong phi ka long kaba kmen. Kan long kaei kaei kaba sngew tynnad ban sdang ia u snem ba thymmai (2025) da kane ka lynti. Ngam lah shuh ban ap ban ngan ioh ban iakynduh ia phi” u la ong sha ki nongkyrshan na India.
Kane ka India tour jong u kan sdang ha ka 30 Tarik Kyllalyngkot 2025 ha kaba yn sdang na Pune, ha Hyderabad 2 Rymphang, ha Chennai 5 8 Rymphang, ha Bengaluru 9 Rymphang, ha Shillong 12 Rymphang bad 15 Rymphang ha Delhi.
Dang katto katne bnai mynshwa, u Ed u la wan ban rwai ha Mumbai ryngkat bad u Nongrwai ba paw na India, u Diljit Dosanjh. Lah ban ong ba hadien katei ka tour ia kaba u la wan mynta u snem, u Ed u la sngewkmen bad sngewieit ia ki nongkyrshan na India bad na katei kaba u la mad, la pynlong ia u ba un jied biang sa shisien ban wan rwai ha kane ka Ri.
Ia ki ticket, yn sdang ban die online lyngba ka website BookMyShow naduh 9 tarik Nohprah 2025. Katkum ka jingkhmih lynti, kane ka concert kan dei kaba heh tam ha ka jylla baroh kawei, kata hadien ka jingwan jong u Akon bad kiwei ha ka Tamasa Cherry blossom mynta u bnai.