Hynne ka sngi ka 29 Tarik Naiwieng 2024, ka North East Police Academy (NEPA) ka la pyndep ia ka jingpynkup burom ia kaba la tip kum ka ‘Passing Out Parade’ ia 90 ngut ki ophisar kiba la pyndep ia ka jingshah hikai ha kane ka shlem kaba don ha Umsaw, Ri Bhoi District.
Ka NEPA kadei ka shlem hikai ba la buh Nongrim da ka Sorkar pdeng na ka bynta ki ophisar ha ki kyrdan bapher bapher ha ka thaiñ Shatei Lammihngi baroh kawei. Ha kane ka sngi kaba kyrpang, u Myntri Rangbah ka jylla, u Conrad K. Sangma u la wan ban long kum u Kongsan ryngkat ka jingiadon lang jong u MLA ka Umsning, Bah Celestine Lyngdoh, Director ka NEPA, u Danesh Rana bad kiwei kiwei.
Haba ai jingkren na ka liang u Myntri Rangbah u la iaroh shibun ia kane ka shlem hikai kaba la sei shibun ki samla ki ba long ki rishot bad ki nongiada na ka bynta ka jylla bad ka thaiñ Shatei Lammihngi baroh kawei. U la iathuh ba naduh u snem 1978, kata ia kaba la seng ia kane ka shlem, la ioh palat 36 hajar ngut ki ophisar na kane ka shlem. “Ka jingkmen bad ka jinghun ban ioh don bynta ha kane ka jingpynkup burom kaba 54 jong ka NEPA.
Ka long ka khyllipmat kaba sngewkmen bad sngewsarong ym tang ia ki samla kiba la pyndep ia ki jinghikai hynrei ia ka longïing longseng jong ki hi baroh kawei.” U la ban jur ruh na ka bynta kine ki ophisar ba ki dei ban shimti shwa ia ka kamram (duty) ha shwa ialade, ban shakri ia ka jaitbynriew da ka hok, ka burom, ka jingieit bad ban iada ia ka hok longtrai bad ka burom jong ki briew.
Hadien ba la pynsngew ia ka kaiphot ba la wanrah da u Director, u Myntri Rangbah u la iaroh ia ki Nonghikai bad ki Nongïalam jong kane ka shlem kaba la pynlut por bad bor ban pyntikna ia ka jingshngaiñ ha ka jylla bad ka thaiñ Shatei Lammihngi baroh kawei.Ha kane ka sngi pynkup burom, na ki 90 ngut kiba la pyndep ia ka jinghikai (training) 40 ngut ki dei na kane ka Jylla bad 50 ngut na kylleng ki Jylla jong ka Thaiñ Shatei Lammihngi (North East India).
