Shi bynta ban ïada ïa ka jingitynnad jong ka mei mariang bad ban ïoh ïaka umbam umdih kaba khuid ba suba, na ka liang ka Jingïaseng Samla Jowai Presbytery, Jowai lyngba ka Socio & Economic Life Development Jingïaseng Samla Jowai Presbytery mynta ka sngi Saitjaiñ 30 tarik u Naiwieng kala pynlong daka jingpynkhuid (Cleaning Drive) ïa ki bynta ka Wah Myntdu kaba dei ka nongbsa umbam ïa ka sor Jowai.
Ïa kane ka jingpynkhuid la sdang haka por 9 baje shiteng naduh ki bynta jong ka Jaka Jwai (Treïongriang) ter ter shaduh ki bynta jong ka jaka tan umbam ha Mupiah, ha kaba la wan ban ïashim bynta shitrhem da ki dkhot (Volunteer) na ki Jingïaseng Samla Balang bapher bapher kiba hap hapoh ki 3 tylli ki Jingïaseng District kata (Jowai, Thadlaboh bad Mustem).
Hashwa ban sdang ka jingpynkhuid la pynlong ïaka jingduwai bala lam khmat da u Tbn. P.L. Dkhar, ha kaba na ka liang u TBn. S.S. Suting uba dei u Chairman JSJP ula ai ki kyntien pdiang sngewbha sha baroh Dkhot (Volunteer) kiba la wan sha kane ka prokram jingpynkhuid ïa ka Wah Myntdu kumba la pynbeit.
La ïathuh ba kane ka dei ka sien ba nongkong ïaka Socio & Economic Life Development Jingïaseng Samla Jowai Presbytery ban shim ïa kane ka bynta ban wanrah ïaka jingkhuid jingsuba ïa ka Wah Myntdu, kaba la sdang ban shah pynjulor ha u khun bynriew ha kiba bun ki bynta naduh ka jingbret pathar ïa ki ñiut ki ner bad ka jingpyntuid ïa ki jakhlia ba bun jait sha ki bynta ka Wah.
Kum ka Jingïaseng Samla Presbytery ka don ka bynta kaba khraw eh bad ban leh eiei halor kane, kumta kala shim ïa kane ka lad ‘kum ka jingsdang ban wanrah ïa ka jingbha jingmiat’. Na ka liang ka jingïaseng Samla Presbytery kan dang bteng biang ban shim ïa kum kine ki lad ban ïada ïa ka jingitynnad ka mei mariang.
Ha ka juh ka por ka buh ka jingkyntu kumjuh ïa ki Nongkhwai ba kin long kiba lehkhuid ha ka por ba leit khwai dohkha, namar bunsien ki Nongkhwai ki shait bret baphar ïa ki ñiut ki ner hadien bala dep pyndomkam khamtam ïa ki pla plastic bad ki klong um nalor kiwei de.
Na ka liang ki dkhot (Volunteer) ba kynthup naduh ki samla kynthei, ki samla shynrang, ki dkhot ka Jingïaseng Samla Jowai Presbytery, ki Pastor lem bad kiwei de ki riew rangbah kila wan ban ïashim bynta shitrhem ban khar ïa ki ñiut ki ner naduh ki platic, ki klong um bad kiwei de ki jakhlia ban pynlum pynlang shi jaka ban ïoh thang lut ïa ki.
La pynkut ïa kane ka jingpynkhuid (Cleaning Drive) da ki kyntien ai khublei na u Secretary ka Socio & Economic Life Development TBn. D.W.C. Shullai bad ka jingduwai pynwai na u Rev. K. Dkhar.
Ka Socio & Economic Life Development JSJP ka buh ka jingkyrpad ïa baroh ki nongshong shnong kiba don talawiar jong ka Wah Myntdu, ba kin don ka jingkitkhlieh ïaka jingkhuid jingsuba bad nym bret pathar ïa ki jakhlia sha ki bynta ka Wah Myntdu kaba dei ka nongbsa umbam.
