Ki nongialam jong ka Hynñiewtrep Integrated Teritorial Organisation (HITO), Jowai Circle hapoh ka jingialam u President u samla Owansaki Pasweth ryngkat u General Secretary Deibormi Siangbood, ha ka 05.12.2024 ki la ïa kynduh ïa u Deputy Commissioner ban pynpaw ba katkum ka RTI ba dang shen ba la ioh da ka seng, la lap ba ka la don ka jingthung kam kaba iaidlait bad kaba be-aiñ ha kaba pyndap ïa ki kam bapher bapher kiba lait ha kiba bun ki tnad treikam hapoh ka West Jaiñtia Hills District.
Ka seng ka la lap ba khlem ka jingpynbna bad khlem pynlong iaka interview ia kiba bun ki kam ba lait u ki heh jong ki tant trei kam ka sorkar bapher bapher kila thung be-aiñ ia ki kandidet katkum ka jingkwah jong ki khlem da bud ia ki kyndon aiñ. Kane ka long ka jingleh kaba ym lah ban pdiang bad kaba pynduh ia ka hok jong kiba dei hok ban ioh ia ka kam ne kiba la biang shisha ka jingnang jingstad.
Ki dkhot HITO ki la kyrpad jur ia u DC ba un sngewbha ban bthah ia baroh ki tnad treikam jong ka sorkar ban pynsangeh noh ia kum kine ki jingthung kam be-aiñ bad ban pynthikna ban pyntip ia baroh ki kam kiba lait sha ka bor ba dei peit la ka long sha ka DSC ne sha ka MPSC.
Katkum ka memorandum bala thoh da kaka seng, ka seng ka dawa ruh ban thung iaki candidate kiba pass katkum ka merit bad ha kajuh ka por ban buh daki video camera haki kamra baki ialeh iaka exam jong ki, nangta pat ka seng kala dawa daka key answer hadien ba kila dep thoh iaki exam jong ki, kata ka mut ban jubab iaki jingkylli jong ki daka ktien katkum ki question paper jong ki.
Shuh shuh ka HITO ka pyntip ruh ia u DC ba ka seng kam kwah ban pynslem ha ka ban pynmih ia ka result jong ki nongialeh eksam ha ka DSC ne MPSC, namar ka jingpynslem ban pynmih ia ka result ka ktah ruh ia ka rta jong ki samla wad kam bad kiwei de ki jingeh.