Ha ka lyngkhuh sngi iap kaba 30 snem jong u Bah Bull N Lyngdoh u ba dei u President barim jong ka KSU, ka KSU ka la rakhe kynmaw burom ia kane ka sngi iap kaba 30 jong utei u rangbah nongialam barim ha u motdur jong u, u ba don ha Malki, da ka jingbuh syntiew bad la pynlong ia ka jingialang kaba lyngkot, hynne ka sngi ka 7 tarik u Nohprah 2024, na ka bynta ban pyrto ia ki kam babha jong utei u Rangbah Nongialam.
Haba ai jingkren ha kane ka sngi, ka para jong u bah Bull ka kong Hana Lyndoh, kala pynpaw ba ha shwa ba kan wan sha ka jingialang, ka iohi ia u bah Bull lyngba ki jingphohsniew, ba u la wan rung ha ïing da kaba rah rynkat, ka lama jong ka KSU, da kaba u la pyntip ba u la wan kylleng sawdong ka Ri Khasi, ka ong ruh ba ka jingipaw lyngba jong ka lyngba ka jingphohsniew ka pyni ba ka KSU kan dang ieng rasong.
Na ka Liang u president rangbah jong ka seng u samla Lambokstar Marngar u la ong, u ba bah Bull u dei u nongialam barim, u la pynpaw ruh ba myn ba ha ki por mynbarim, ha ka por ba u bah Bull u dang long u nongialam KSU, bun ki briew kiba beiñ kiba kynthoh, hynrei mynta pat ki dei ki juh ki briew kiba iaroh, da kaba ong ba kat uto u nongialam, yn nym ioh shuh.
Shuh shuh u la ong ia ki dkhot jong ka KSU kiba don mynta dei halor kata ka Nongrim ba ki dkhot ka KSU ki dei ban long kiba iai shah bad trei ia la kam bad tynrong ia ka lyngkor na ka bynta ka jingbit jing biang ka ri bad ka jaitbynriew.
Nalor u samla Lambokstar, kiba ai jingkren ki khynthup ia u samla Raymond Kharjana Organizing secretary KSU CEC, u samla Pynphai Rani Published secretary, ha katei ka jingialang la don lang kiba haïing u bah Bull, ryngkat ki dkhot ka KSU na ki unit bad ki circle bapher bapher.
Kum ban shu pynkynmaw khyndiat shaphang ka jingim jong u Bah Bull N lyngdoh. U Bull N Lyngdoh uba ki paidbah ki tip kum u Bull u dei u President ba saw jong ka KSU. U la shimti ia ka kam President ha u snem 1983 tad haduh u snem 1990. U la bat ruh kum u Secretary General ka North East Students’ Union (NERSU) hapdeng kine ki snem.
U Bah Bull u pawkhmat bha halor ka jingiakhih pyrshah khardai ha u snem 1987 kaba la tip ruh kum ka 2nd Anti-foreigners Movement hadien ka jingiakhih pyrshah kharbangla ha u 1979 ba la lam khmat da u Bah Michael Syiem. U Bah Bull ha ki por u Bah Mike u bat kum u Disciplinary Secretary ka seng.
Dei hangne ba ka KSU lyngba u Bah Bull ki la ieng rangbah ban ia khun ia kine ki poiei pyntriem ia ka Jaidbynriew bad ka jingiakhih ka la neh haduh shi snem kynthih.
Bun ngut ki Khasi ki la shah kem, shah pyniap bad shah set along. Ki bor shipai, CRPF bad pulit ki thom naphang ia ki Khasi. U Bah Bull u shah kem bad shah tied naphang ha ki bor sorkar.
U Bah Bull u la ia khun ilekshon ha u 1990 na Malki-Nongthymmai Constituency bad u la jop, hynrei hadien um treh ieng ilekshon shuh namar u la i ngiah ia ka jyrsieh politics.
Namar ka jingshah tied shah pynshitom ha ki bor pulit, u Bah Bull um lah kyrda shuh na ki jingpang bad u la khlad noh na ka pyrthei ha ka 7 tarik u Nohprah 1994 ha ka rta ba dang lung, kata 42 snem.
