U Symbud Myntri Rangbah ka jylla Meghalaya, u ma Sniawbhalang Dhar, ha ka 5 tarik December 2024 u la wan ban lehkmen lang bad ki briew ki ba don jingduna ha ki dkhot met bapher bapher ha ka jingrakhe ia ka International Day of Person with Disability ha ka shnong Ummulong, West Jaintia Hills. Ia kane ka sngi kyrpang jong ki ba dunadkhot met ha shityllup ka pyrthei la pynlong da ka ophis jong ka District Social Welfare Officer West Jaintia Hill District ha ryngkat ka jingiatreilang bad ka People’s Welfare Development Society.
La sdang ia kane ka sngi da ki jingiakop ha ki jingialehkai bapher bapher, kum ka jingiaknieh shuki (Musical chair), Iaknieh ball (passing the ball), jingiakoprwai (singing) ha ki kyrdan Junior bad Senior bad kumjuh ruh ka Health check up ia baroh kiba wan iashim bynta sha kane ka program. Ha kane ka sngi la wan iashim bynta da palat 100 ngut ki briew ba don jingduna dkhot met kiba hap hapoh ka Thadlaskein C&RD block.
Ia ka program ha ka shitengsngi, la pyniaid da u bah Mutshwa Thabah (President PWDS) bad la ioh ia ka jingkren maitphang na i kong Y. Najiar, District Social Welfare Officer Jowai i ba la batai ia ka jingmut jong kane ka sngi bad ka phang pdeng (Theme- Amplifying the leadership of person with disability for an inclusive and sustainable future) jong ka jingrakhe International Day of Disability mynta u snem. Ki ba ai jingkren ha kane ka sngi ki kynthup ia i Dr Lucky Rymbai i doctor na ka Ummulong CHC, u bah Iahmihoo Khyriem (resource person), u bah C.A Ram Kyndiah District Rehabilitation Centre Disability Affair, Civil Hospital Ialong bad i kong D V Lyngdoh, CEO Municipal kum i symbud kongsan.
Ha shwa, ka jingkren jong u Kongsan, la ioh ia ka jingrwai na ki khynnah skul ka School of Mother Elizabeth for Visually Impairment Children, Nangbah WJHD. U ma Sniawbhalang Dhar, ha ka jingkren jong u, kum u kongsan u la ai khublei kyrpang ia ki briew ba don jingduna dkhot met ha kane ka sngiburom jong ki. U la ai jingiaroh ia ki ophisarjong ka tnad Social Welfare, WJHD ki ba la treishitom ban pynioh ki lad jingiarap sha kine ki briew badonkam ka jingiarap ba kyrpang. U la ai mynsiem bad pynshlur ia baroh ki briew ba don jingduna dkhot met ban mih sha khmat bad ban don ka mynsiem iakhun ha baroh ki bynta ka jingim katkum ka jinglah jong ki. U la ai ruh bun ki nuksa jong ki briew ki ba duna dkhot met ki ba la wanrah jingjop ha ka jingim jong ki ha ki bynta bapher bapher. U la kyrpad ruh ia ki kmie ki kpa ban ym duh mynsien hynrei ban kyrshan ia ki khun jong ki ha ki bynta bapher bapher jong ka jingiaidlynti ki khun jong ki. U la ong ruh ba na ka liang ka sorkar, kin ialeh katba lah ban kyntiew ia ki lad jingiarap sha ki briew ba don jingduna dkhotmet.
La pynkut ia kane ka sngi da ka jingsam ia ki khusnam ha ki jingiakop bapher bapher bad ka jingaisngewbha sha baroh ki ba wan sha kane ka program kumjuh ruh ki kyntien ai khublei na u bah E.S Kyndait.
