Ka Sarot I Man (SIM) kawei na ki kynhun (group) jong ki 11 ngut shi paralok, kumba ka juh trei ia ki kam manla u snem ha shuwa ban poi ka sngi dap snem jong ka, mynta u snem ruh kala ioh ban leh ia ki kam jong ka kiba ia dei bad ka jingmyntoi ha ka imlang sahlang.
Ha kane ka 07.12.2024, kum ka mynsiem ban iarap kylliang ia kiba donkam ka jingiarap kiba ka seng ka la iohi, ki dkhot ka SIM ki la leit ban sam da ki sopti sha ki nongshong shnong ka shnong Lumlakhiat.
Hashwa ban sam ia kine ki sopti sha kitei ki nongshong shnong la don ka jingialang kaba lyngkot, ha kaba la ioh ia ka jingpdiang burom na u Waheh Shnong ka shnong Lumlakhiat, u ma Edward Shadap, nangta la aiti ha u ma Mariabud Paswet u dkhot ka Sarot I Man ban bteng ia ka jingialang.
La ioh ruh ia ka jingpynithuh ia ki dkhot na u ma Riquoma Rq. Laloo, uba la iathuh ia ki rukom treikam jong ka seng bad ki dkhot baroh, kiba kynthup naduh ki kyrdan pule puthi, ki jingtrei jingktah jong ki bad ia ki kam kiba ki sngewtynnad ban leh. La ioh ia ki kyntien nguhblei na u ma Kyllimot Lhuid, hadien nangta ki jingkren na u ma Jait dao Sumer, u ba la kren shaphang ka Sarot I Man, kumno bad mynno la sdang ia ka. U ma Jait, u la iathuh ruh ia ki kām ka SIM, kaba ym dei ba tang shu seng ia ka, hynrei ha kane ka kynhun ka don ki dkhot kiba don jngai ka jingmut jingpyrkhat, naduh ka pule puthi bad ki kām bapher bapher. U la ong ruh, ka Sarot I Man, ka la iarap kyrpang ia ki briew kiba donkam ka jingiarap, ha kaba ka la juh leit synniang ia ka snām da kaba leit ai ne donate sha ka Jowai Civil Hospital Blood Bank, kaba ha Panaliar Jowai.
La ioh ruh ia ki jingkren ha ka jingiadei bad ka jinglong jingman kaba mynta na u ma Barleemoore Shilla, ha kaba kumno ban iada ne pyllait ia ki jingshah pom pathar ki dieng ki siej, ka shongkha khynnah bad ka jingkordor jong ka kmie bad u kpa. U la kyntu jur ruh ia ki paid nongshong shnong ban ialeh pyrshah katba lah ban ym dei ban shah ialam bakla ha kiwei pat kiba don ka jingmut ban pynjot ia ki khaw ki btab. U la pynshai ruh ban kiar na ka jingshongkha khynnah bad ban bud ia ki kyndon jong ka rta kiba la buh da ka sorkar.
La ioh ruh ia ki kyntien ai khublei kyrpang na ka Head Teacher ka skul Lumlakhiat Government L.P. School, kong Chindarish Sumer, kaba la ai ka jingsngewnguh bad iaroh halor kane ka jingsneng bad jinghikai ha kane ka skul lyngba ki dkhot ka SIM.
U ma Mariabud, shwa ban pynwai ia ka jingialang u la pynbna ba ka SIM ha une u snem ruh kan pynlong ia ka Blood Donation Camp ha ka 20.12.2024 ha ka por 10:30 mynstep ha Jowai Civil Hospital Blood Bank, Panaliar Jowai. Kumta la khot ia baroh kiba don ka mynsiem ban iarap kylliang ia kiwei ki para briew ba kin wan sha katei ka camp.
Ia kane ka khubor la phah da u dkhot ka SIM u ma Wombai Sumer.