Ka kynhun Rangkynsai ka la ioh ia ka kabu ban rah ia ka nam lahduh jong ka lympung 9th Bull Nongjop Lyngdoh Memorial, hadien ba ka la lah ban pynliem ia ka Southern Border Area FC da 2-1 ha ka jingiakhun ba la pynlong ha madan Malki Shillong.
Ia kane ka lympung la pyniaid da ka Khasi Students Union (KSU) Malki Circle kaba dei shi bynta ban kynmaw burom ia ka sngi iap ba 30 jong u Bah Bull N. Lyngdoh President barim ka Khasi Students Union (KSU) (1984-1990).
Ha kane ka sngi ba pynkut ia kane ka lympung, la wan ban don ryngkat da u President Rangbah ka Seng KSU, seng Kmie, u Bah Lambokstar Marngar, u Vice President samla Donald V. Thabah, Bah P.K Sohtun bad kiwei kiwei ki Nongïalam ka shnong Malki.
Ka jingiakhun ka long shisha kaba itynnad bad kaba pynhun ia kiba wan sakhi ia kane ka jingiakhun. Baroh 2 kynhun ki la sei bor na ka bynta ka jingthmu ban ioh rah ia ka nam lahduh. Ka Southern ka la ioh ban pynkhih jar nyngkong ha ka kylla step hynrei hadien ka kylla miet, ki rangialehkai ka Rangkynsai ki la ioh ban pynphai noh 2 kol ha shwa ban kut ka minit ialehkai.
Ka Rangkynsai kaba long ka lahduh ka la ioh ban khur 1 lakh ka song Pisa ryngkat ka trophy bad ki takma, bad 50 hajar sha ka Southern Border Area kaba la ioh ia ka kyrdan ba ar.
U ‘rangapkol ba dang 16 snem na ka kynhun Border Area FC u la ioh ban khur ia ka khusnam ‘Best goalkeeper’ ryngkat ka song Pisa bad ia ka nam ‘Best Descpline team’ la khur da ka kynhun K.M.L. FC.
