Ka Sorkar Jylla mynta ka sngi ka 9 tarik Nohprah 2024 ka la pynbna ha ka jingialang ryngkat bad ki Myntri Sorkar ban khang noh ïa ka Mawmluh Cherra Cement Limited (MCCL)ka karkhana pynmih cement ba pawnam ha Sohra.Ia kane la pynbna da u Myntri Rangbah hadien ba la wai ka kynhun Myntri .
Haba kren sha ki lad pathai khubor U Myntri Rangbah ka Jylla Conrad K. Sangma, u la pynbna ia kane ka rai, da kaba ong ba ka dei ka sienjam kaba “shitom hynrei kaba donkam”.
Ka jingkhang kan kynthup ïa ka skhim shongthait mon sngewbha (VRS), ka ban kyrshan ïa ki nongtrei kiba shah ktah. Ia kane ka skhim la mynjur da ka kynhun myntri hadien ba la iakren bniah bad ki nongtrei ka MCCL.
Ka jingktah ha ka liang ka pisa tyngka jong ka jingkhang la khmih lynti ba kan long kaba khraw, ha kaba la antad ba ka jinglut kan long palat ₹100 klur. Kane ka pisa kan siew ia ki jingmyntoi jong ki nongtrei hapoh ka VRS bad ka jingpynbeit ia ki jingkitkhlieh kiba dang sah.
Kumba 205 ngut ki nongtrei kin shah ktah na katei ka jingkhang, hynrei ka sorkar ka la pynthikna ba la pynbeit ia ki jingeh jong ki.
Ia ki mar ki mata jong ka MCCL yn sa pynduh noh hadien ba la khang pyrshah ia ka hukum, ha kaba yn thaw ia ka komiti ban peit ia ka jingtreikam. Ka sorkar kan wad ruh ia ka lad ban pyndonkam biang ia ki katto katne ki mar ki mata, kynthup ia ki jaka, kiba lah ban long kiba myntoi ia ka jylla.
Ia ka rai ban khang ia ka MCCL ym shym la shim sting, ha kaba ka sorkar ka la wad lypa ia ki lad ki lynti ban pynim biang lyngba ki jingiatreilang bad ka jingbei tyngka jong ka sorkar. Hynrei kine ki jingthmu kim shym la ai jingmyntoi bha namar ki daw bapher bapher, kynthup ia ka jinglah ban kamai pisa bad ki jingaiwai tih mawshun kiba la kut por.