Ha ka jingialang ki Kynhun Myntri hynne ka sngi ha ka jinglamkhmat da u Myntri Rangbah ka jylla Conrad K. Sangma, la mynjur ia shibun tylli ki mat sahteng bad kiba thymmai kynthup ia ka Operation – Maintenance Policy and Manual naka bynta ki skhim sam um sha ki thaiñ nongkyndong kiba pyntreikam lyngba ka skhim Jaal Jevan Mission (JJM) jong ka Sorkar Pdeng bad kiwei kiwei.
Haba kren sha ki lad pathai khubor, u Myntri Rangbah ka Jylla, u Conrad K sangma u la iathuh ba lyngba ka skhim JJM ka Meghalaya ka ioh pisa daki hajar klur ban tei iaki jingdonkam haba pyntrei iaki skhim sam um haki thaiñ nongkyndong bad namar kane ka long kaba donkam ban khmih bniah iaki jingtei ba donkam ha baroh kawei ka Jylla.
U Myntri Rangbah u la iathuh ruh ba ka Kynhun Myntri ka la mynjur ruh ban thaw ia ka Governor’s Civil Defence Medal, kane ka long naka bynta ban pynkupburom iaki Nongtrei hapoh ka tnat Home Guards and Civil Defence jong ka Jylla.
Nalor kane ka kynhun Myntri Sorkar kala mynjur ban pynlong noh iaka elekshon MDC sha ka Khasi Hills Autonomous District Council (KHADC) bad sha ka Jaintia Hills Autonomous District Council (JHADC), ia kane la pyntip da u Myntri Rangbah ka Jylla u Conrad K Sangma.
U Conrad K. sangma u la ong ba na ka liang ka Sorkar kan phah iaka rai jong ka Kynhun Myntri sha u Lat ka Jylla ban ai jingmynjur iaki tarik bad ki sngi pynlong elekshon.U Myntri Rangbah u la iathuh ruh ba ka Kynhun Myntri Sorkar hynne ka sngi ka la mynjur ruh iaki 2 tylli ki Service Rules jong ka tnat ka koit ka khiah. Kine ki Services Rules ki kynthup naka bynta ka Meghalaya Drugs Control Wing bad ka Meghalaya Commissionerate of Food and Safety Officers Enforcement and Technical and Subordinate Staff.
U Myntri Rangbah u la ong ba ka Meghalaya Drugs Control Wing kala treikam mynta la jan 50 snem hynrei haduh mynta kam pat don iaka Service Rules.
Ha kane ka sngi ka Kynhun Myntri Sorkar kala mynjur iaka song pisa ban ai sha ki 205 ngut ki Nongtrei Mawmluh Cherra Cements Limited (MCCL). Kum shi bynta ban iarap ia ki 205 ngut ki nongtrei MCCL ha Sohra, Mawmluh ki ban duh kam noh namar ka jingkhang dam noh iaka MCCL, ka Sorkar Jylla ka la rai ban pyntreikam noh daka Golden Handshake, lane ka Voluntary Retirement Scheme (VRS).Ka Sorkar kan pynlut ym duna iaka T.100 klur ban siew sha ki Nongtrei ka MCCL lada pyntreikam daka Golden Handshake, lane ka Voluntary Retirement Scheme (VRS) hadien ba la khangdam noh iaka MCCL bad kane ka long hadien ba la iakren sani bha bad baroh ki nongtrei kane ka karkhana pynmih dewbilat.
“Hadien ka jingïakren sani bha bad ki Nongtrei MCCL, la rah ia ka jingïakren sha ka miej jingïakren jong ka Kynhun Myntri bad la mynjur iaka song pisa. Hadien kane iaka jingïakren yn sa rah biang sha ki Nongtrei ka MCCL bad hadien ka jingmynjur lang da baroh, kan don ka jingiasoi iaki kot ki sla ban ai iaka song pisa bad hadien kata yn khangdam noh ia ka karkhana” la ong u Conrad.
Haba kylli u Conrad u la ong “Hadien bad ki Nongtrei ka MCCL ki la ai jingmynjur iaka song pisa, ka Sorkar kan sa bishar kumno ban leh iaki tiar ki tar kiba don hapoh ka karkhana lane iaka jaka”.
U Myntri Rangbah u la pyntip ruh ba Ki 5 tylli ki College Sorkar hapoh ka Jylla, ki ba kynthup ia ka Sohra College, William Nagar Government College, Bagmara college, Mawphlang College bad ka Mahendraganj College kin ioh ban pule noh ia ka Science Stream.
U la ong ba kane ka jingsdang noh iaka Science Streams hapoh kine ki 5 tylli ki College kadei kum shi bynta ban bud ryntih iaki kyndon treikam ka National Education Policy (NEP) kaba dkew shai ba ki Government College ki dei ban don bun jait ki tnat Pule.
U Myntri Rangbah u la pyntip ruh ba kaba kongsan mynta kadei ban thungkam haki katto katne ki College khnang ban sdang noh iaki tnat Pule Science bad Commerce ha ki Government College.