Kiba duna ha ki dkhotmet khamtam kito kiba don ka jingduna ha ka bor ïohi, mynta ka sngi 11 tarik December, 2024 kila leit ïa kynduh ïa u bah F.B. Basan, Additional Deputy Commissioner, West Jaintia Hills District uba long ruh u Project Director Department of Rural Development Agency ban kyrpad ïa u ban pynïoh ha ki ïa ka hok kaba ki dei ban ïoh.
Kane ka kynhun hapoh ka jingialam jong u Kelvin Suting bad u Krishna Phawa, kila leit ban ïa kynduh ïa u PD ka DRDA na ka bynta ba ka sorkar kan ai noh ïa ki ka Special job card ha ka scheme shispah sngi. U Krishna Phawa uba ym lah satia ban ïohi ula ong namar ka dei ka hok jong ki ban ïoh ïa ka special job card, hynrei haduh mynta kiba bun na ki nongshong shnong kiba don jingduna ha ki dkhot met kim ïoh satia ïa kane ka hok jong ki. Napdeng kiba la wan ïakynduh kiba don jingduna ha ka bor ïohi kum ka Durka Sari bad u Kelvin Suting ki ïathuh ba ïalade kila ïoh Special Job card, hynrei kim kwah pat ba tang ma ki kin myntoi na kane ka scheme sorkar.
Na ka liang jong u Basan ula kular ban un leh ïa kaba donkam ba kiba don jingduna ha ki dkhot met kin ïoh ïa la ka hok ban ïoh ka special job card.
Ha kane ka juh ka jingïalang na ka liang jong kine ki dkhot kiba don jingduna ha ka bor jingïohi kila pynkynmaw ruh ïa ka hok jong ki ban ïoh ïa ka special ration card. Halor kane ruh u bah FB Basan ula kular ba katba shong ka bor jong u, un ïarap ban kin ïoh ïala ka jong ka hok. Ha kane ka jingleit ïakynduh jong ki ïa u ADC la ïadonlang ruh u Dr. H.H. Mohrmen.
