U Myntri kam jngohkai pyrthei ka jylla u Bah Paul lyngdoh mynta ka sngi ka 12 tarik Nohprah u la plie paidbah ia ka tamasa Winter Tales ha Ward’s Lake Shillong.
Haba ai jingkren ha kane ka sngi u Bah Paul Lyngdoh u la ban jur ïa ka jingdonkam ban rakhe ïa ki bor ba kyrpang jong ka Meghalaya, kynthup ïa ka jingitynnad jong ka mariang, ki jingrwai, bad ki kam shna dur.
Kane ka tamasa Winter Tales ka la pynmih ruh ia ka phang “Ka jingpyniaid beit,” kaba pyni ia ka jingangnud jong ka jylla ban pynneh pynsah ia ka kam jngohkai pyrthei. U bah Lyngdoh u la pynpaw ia ka jingsngew sarong halor ka jingroi jong kane ka tamasa, ha kaba mynta ka pyni ia ki nongtrei kti, ki nongthaiñ jaiñ, bad ki nongseng kam seng jam na baroh ki 12 tylli ki district jong ka jylla Meghalaya.
Ka jingplie paidbah ia kane ka tamasa Winter Tales ka kyntiew ïa ki jingthmu kiba ïadei bad ka mariang, kynthup ïa ka jingpynïapher ïa ki jaboh bad ka mariang kaba khlem plastic. Ki nongwan jngohkai ki lah ban ïoh mad ïa ki jingbam jong ka thaiñ, ki jingrwai, bad ki jingshna kti.
U bah Paul u la ai khublei ïa ka kynhun bad ïa baroh kiba don bynta ban pynlong ïa kane ka tamasa kaba jop. U la pynbna ruh ba ka Jylla Meghalaya kan sa ïashim bynta ha ka tamasa jngohkai kaba heh bha ha Gujarat ha u bnai February ban wan, ha kaba yn ithuh ïa kane ka jylla na ka bynta ban kyntiew ïa ka Green Tourism.
