Ka Hynniewtrep Integrated Territorial Organisation (HITO) Jowai Circle, kala pynkynmaw ba ka la leit ban buh ia ka memorandum haka ophis treikam jong Jaintia Hills Autonomous District Council (JHADC), ha kaba ka seng kala ia kynduh ruh ia u A. Shadap MDC u ba dei ruh u Chairman ka Political, ha kaban leit pynkynmaw ia ki kam kiba dang sah ha ka jingiadei bad u pud u sam jong ka nongbah Jowai.
U President ka HITO u samla Owansaki Pasweth u la ong katkum ka shithi ba la jubab na ka Council, baka jingpynbeit ia u pud u sam ka dang long kaba dang sahteng, tang na ka daw ba ki katto katne ki Dorbar Shnong ki khlem leit mih sha khmat bad ki bym don kata ka jingkitkhlieh. Na ka liang ka seng ka la pynbor iaka Council ban ai da ka order lane ka deadline ha ka jingiadei bad kito kiba kwah ban heh ka shnong khnang ban iaid beit ka kam bad ban lait na ka jingsah teng.
Shuh shuh ka seng kala ong ba ka jingdon jong ka Synjuk ki Waheh Shnong, ha ka jingshisha kam dei ban tlot ka kam shnong. Ka seng ka la ong ruh ba ka jingdon kane ka Synjuk ki Waheh Shnong ka seng ka ngeit ba kan long kaba suk ban pynbeit ia u pud u sam jong ka nongbah Jowai.