Hynne ka sngi ka 13 Nohprah 2024, u Bah Metbah Lyngdoh u President ka United Democratic Party (UDP) ha ka jingialang ka General Council jong ka party kaba la long ha Ophis treikam ka UDP, u la ong ba ka dei tang ka party UDP kaba lah ban kam ba kan sar naphang ha ka MDC elekshon namar ba ka la trei, ym kum kiwei ki party kiba shu kam khlem Nongrim.
“Ka jingkam ba ka party A lane party B kan sar naphang ha kane ka MDC elekshon, ki kam halor kaei ka Nongrim bad haba kam ki dei ban don ka Nongrim ban kam ia kata, hynrei ka dei tang ka UDP kaba don ka Nongrim ban kam ba kan sar naphang ha ka MDC Elekshon namar ka la trei” ong u Bah Metbah.
Halor ka jingialang General Council ka UDP, u bah Metbah Lyngdoh u la iathuh ba kum ka party ka ju lum ia ka jingialang jong ki dkhot na baroh ki District ban iakren halor kiba bun ki mat, bad rah ruh ia ki mat ki ba iadei bad ki District Council.
U la ong ruh ba mynta ka sngi la ioh ruh ban pynlait ia ki kyrteng jong ki 26 ngut ki kyrtong ki ban iakhun ia ka MDC Elekshon na ka bynta ka KHADC bad JHADC bad ia kine la jied katkum ka jingai jingmut jong ki nongkitkam ka party.
“Na ka liang ka UDP ka la pynkhreh bha ban aireng ha kane ka Elekshon” u la ong . Da kaba bynrap ba ia ka thup kyrteng kaba ar yn sa ialeh ban pynbna noh ha shwa ka Khrismas.
U Bah Metbah u la ong ruh ba ka party kan shim ka jinghikai na ki por ba la dep bad mynta ka kynti kan treishitom ban pynthikna ba kan ioh ia ka jingjop ha baroh ki konstitwensi.
U la ong ruh ba baroh ki party ki ban hiar iakhun ha kane ka Elekshon ki dei kiba khlaiñ bor bad kan dei ia ka UDP bad kan trei shitom ha baroh ki liang.
Halor ka jingiatreilang ka UDP bad NPP u la ong ba “Kam dei ban don kano kano ka jingshah ialam bakla ia ki paidbah halor ka jingiatreilang ka UDP bad ka NPP ha ka sorkar namar ka UDP kan iakhun ia kane ka Elekshon halor ki mat jingeh ha ka Jylla.