Sa tang khyndiat bnai ban wan ki sngi ki la jan na ka bynta ban jied ia ki MDC thymmai ha District Council, mynta ka sngi ki MDC ka Congress ki la rai ban weng noh ka jingiatreilang bad ka Executive Committee (EC) jong ka Khasi Hills Democratic Front (KHDF) ba la ialam da ka National People’s Party (NPP) ha Khasi Hills Autonomous District Council (KHADC).
Haba kren sha ki ladpathai khubor, u Bah P.N. Syiem u la iathuh ba na ka liang jong u, u la dep ban phah da ka Shithi sha u Chairman ka KHDF u Bah Pyniaid Sing Syiem, ba un hiar shuki noh kum u Deputy Chief Executive Member (Dy CEM) bad u Bah Ronnie V. Lyngdoh kum u Chairman ka Advisory Committee ka Council bad kumjuh na ka liang u Bah Victor Ranee ban iehnoh ia ka kam EM.
U Bah Syiem u la iathuh ba ka daw hi ba ki la rai ban weng noh ka jingiatreilang bad ka KHDF ka long hadien ba na ka liang ki Nongialam ka party bad ki nongtrei ka party kim sngew iahap ban iatreilang bad ka NPP ha KHADC.
“Ki nongialam ka party bad ki nongtrei ki la pynbor ia ki Nongialam ka Congress ha KHADC ba kin weng noh mardor ia ka jingkyrshan ia ka EC ka NPP naduh ka 20 tarik Nailur mynta u snem. Kumjuh ruh ki President jong ki District Congress Committee (DCC) kila thoh shithi dang shen sha ka AICC ban phah tuklar halor ka jingslem jong ki MDC ban mih noh na ka EC ba ialam da ka NPP ha KHADC” u la ong.
Shuh shuh u la bynrap “kane ka rai kan ym ktah satia ia ngi ha ka elekshon ban wan namar ki MDC ka Congres ki lah ban leh shibun kiei kiei ha ka por kaba lyngkot, ki paidbah kin kham khmih kham bun na ngi bad ngin sa leh ia kaba donkam”.
Kumba ka long mynta ka jingmih noh ka Congress na ka KHDF kan ym ktah eiei ia ka EC ba la ialam da ka NPP hapoh ka KHADC. Lah ban kdew hangne ba ka Congress ka don 3 ngut ki MDC, bad ka KHDF ka Don 16 ngut ki MDC ba kynthup ia ka NPP-15 ngut bad uwei u MDC shimet, 7 ngut ki MDC na ka UDP , 1 na ka HSPDP, uwei u MDC bad shu thung bad 2 ngut ki MDC kila khlad ha une u snem ba kynthup ia u MDC ka UDP na Shella Bah Teinwell Dkhar bad u MDC shimet na Nongthymmai Bah Latiplang Kharkongor.