Ka kynhun ïalehkai jong ka Nangbah Mulang, kala long ka lahduh ha ka jingïakhun phainal mynta ka sngi ha ka kyrdan Super Division Football Tournament 2024, kaba la tip ruh kum ka ‘U Kiang Nangbah Memorial Trophy’ ba la pynïaid daka West Jaiñtia District Sports Association, (WJDSA), kaba la pynlong ha madan Kiang Nangbah Stadium, Ladthalaboh Jowai.
Haba phai sha ka jingïakhun final mynta ka sngi kala long kaba itynnad bad kaba ïakhaid bor bha hapdeng kine ki ar kynhun, hynrei ha ka minit kaba 12 jong ka jingialehkai ka Nangbah Mulang ka la ioh ban pynkhih ia ka jar lyngba u Timmy Ryngkhlem kaba long ruh ka kol pynjop syndon ia kane ka kynhun Nangbah Mulang.
Ha ka jingialehkai second half ka jingialeh ka la nang itynnad shuh shuh da ka jingiakhun tyngeh jong ki nongialehkai jong ka Demthring SC, hynrei ka jingiakhun tyngeh ka jong ka Demthring SC bad ka jingpyrshang ka jong ka ban thep ia ki kol kam shym la urlong satia. Kumta ka jingialehkai kala kut noh da 1-0 kol ha kaba ka Nangbah Mulang ka la ioh ban rah ia ka nam lah duh ha kane ka lympung mynta u snem 2024.
Ïa ki khusnam sha ki nongjop la sam da u kongsan jong kane ka sngi uba dei u MLA ka Jowai ma Wailadmiki Shylla ha ryngkat ka jingdonlang, MDC JHADC ma Lakhon Shylla, u DSO ma K. Passah, EMH Passah Working President WJDSA, Patrict Lamare Vice President, ki nongkitkam jong ka WJDSA nalor kiwei de.
Ka Nangbah Mulang kaba ïoh rah ïa ka nam lahduh kala ïoh ruh ia ka song pisa kaba 1 lak tyngka ryngkat ka Trophy, katba ka kynhun ba wan ba ar ka kala ïoh rah 50 hajar tyngka lem bad ka trophy, ia kane ka song pisa mynta u snem ha kane ka lympung la synniang da u ma Wailadmiki Shylla, MLA ka Jowai.
la sam ruh ia ka khusnam Top Scorer bala ioh da u Niponghi Summer na ka Nangbah Mulang, Best Goal Keeper sha u Ialamlang Biam na ka Ladthadlaboh SC, Player of the Tournament la ïoh da u Wadshwa Lato na ka Demthring SC bad ia ka Man of the Match la ioh da u Timmy Ryngkhlem na ka Nangbah Mulang.
Mynta ka sngi ka WJDSA ka la pynkup burom ruh ia ki ar ngut ki referee kiba kynthup ia u Sebastian Suting uba la pyndep ia ka National Referee (Panel B) 2024 Basketball Federation of India bad ia u Bulmi Phawa, uba la pyndep ia ka National Referee (Leve 5) 2024, All India Football Federation.
