Ka ‘Jingkieng Nar’ kaba don ha ka Wah Myntdu kaba la tei naduh ki por ka sorkar phareng ne British Government ha u snem 1917, kaba la don mynta 107 snem, mynta ka la don hapdeng ka jingjot rathai bad kaba la shah iehbeiñ la bun bun snem ha ki tnad sorkar ba dei peit. Ka jinglong jingman jong kane ka jingkieng kala wanrah ka jingbynñiaw na ka liang ki nongleit nongwan kiba dang pyndonkam ia ka haduh kine ki sngi. Kane ka jingkieng ka don hapoh u pud u sam jong ka Dorbar Shnong Khimusniang, Jowai.
Ha ki por hyndai ia kane ka jingkieng la pyndonkam ban leit jingleit ki Syiem Jaintia bad kumjuh ki Phareng da ki kali kulai na ri Lum Jaintia shaduh Jaintiapur kaba la hap mynta shapoh ka ri Bangladesh. Haduh mynta ruh ia kane ka jingkieng ki briew ki dang pyndonkam ia ka, naduh ki nongshong shnong ka shnong Mustem, Muphlang bad kiwei haba ki leit sha Jowai kumjuh ki briew na Jowai ki pyndonkam ban leit sha ki tei ki shnong, la pyndon kam ruh ia ka da ki nongleit khwai ha ka wah Myntdu bad ki nongleit shangkai pyngngad namar don shibun ki jaka ba itynnad bad ki jaka bam khana, shongkai pynngad bad ki thwei ban sum kaba man la ka sngi ki briew ki leit kai sha kane ka jaka lait noh tang ha ka por slap. Na ka bynta ki nongkhwai wat ha ka por slap ki hiar sha kane ka jaka bad ban kam shi liang ia ka wah Myntdu ki pyndonkam lyngba kane ka jingkieng.
Kumba long mynta pat kaba isynei bad isangsot ban peit ia kane ka jingkieng namar ym don shuh ba maramot ia ka, ka la jot la pra bad khamtam eh ki katto katne tylli ki nar jong ka kane ka jingkieng la don ba ot ne tuh da ki briew kiba ym lah ban ithuh, ki lyntang jong kane ka jingkieng bun ki long kiba la pyut bad kdiah noh, kane ka buh ha ka jingma ia ki nongiaid nongieng.
Ha ka jingiadei bad kane na ka liang ka shnong Khimmusniang lyngba u Waheh Shnong u ma Aridauni Lamare ryngkat u nongthoh khubor ki la leit ban jurip ia katei ka jingkieng nar ha kaba la lap shisha ia ki jingjot jong katei ka jingkieng kaba la buh jingma ia ki nongleit nongwan. Na ka liang u ma Lamare, u la ong “Ba kum ki nongpyndonkam ia kane ka jingkieng ngi kyntu ia ki bor ba dei peit ban maramot ia ka, namar kumba long mynta kane ka jingkieng ka la buh ka jingma khamtam ia ki kynthei ki khynnah bad ruh khamtam u la kyntu ia ka sorkar ban buh ki jingmaham ia ki ba pynjot bad tuh ia ki nar jong kane ka jingkieng”. Shuh shuh u ma Lamare u la kyntu ruh ia ki nongleit nongwan kai sha kane ka jaka ba kim dei ban bret pathar ia ki ñuit ki nier kumjuh ruh ia ki plastic sha rud jong ka wah Myntdu kaba dei ka um bam um dih jong ka nongbah Jowai.
U ma Lamare u la ong ruh kum kine ki jingtei kiba la tei naduh ki por phareng ka long kawei na ki jingtei ba sah nam hapoh ka shnong ka thaw bad ka thaiñ hi baroh wei kaba khring ia ki nongwan jngoh kai pyrthei bad kaba pynitynnad ia ka thaiñ. Kumta na ka liang jong u sa shisien u kyntu biang ia ki bor ba dei peit ba kin maramot bad sumar ia kum kine ki jingtei sahnam bad kiba ai jingmyntoi ia ki briew paidbah.
Ha kane ka jingleit jurip la ioh ruh ban iakren ia ki katto katne ngut ki nongshong shnong jong ka shnong Mustep kiba la pynpaw ia ka jingeh lada kane ka jingkieng kan jot ne duh noh, na ka liang jong ki ruh ki la kyntu ia ki bor ba dei piet ban maramot ia kane ka jingkieng bad dawa ruh ba dei ban siang da ki kynja nar ne ki steel ha ka jaka jong ki lyntang ia ki jaka iaid jong kane ka jingkieng ba kin kham neh slem. Shuh shuh ki la pynpaw ka jingsngewsih ha ka jingiadei bad ka jingsha ot ne shah tuh jong ki nar kiba bat bad pynskhem ia kane ka jingkieng.
