Ka Synjuk ki Dorbar Shnong Shangpung kaba dei ka Sponsoring Body jong ka Shangpung College, mynta ka sngi 18 tarik u Nohprah, 2024 kala rakhe ïa ka lyngkhuh dap snem ba 84 jong ka sngi ïap u Myllung Soso Tham, ha kaba ïa ka jingïalang la pynlong ha Basketball Court, Shangpung Mission, West Jaiñtia Hills District.
Ïa ka jingïalang ha kane ka sngi la pynïaid da u ma Emmitre Iakai Asst. Professor, Shangpung College bad ka jingkren pdiang na u Waheh Shnong, Shangpung Mission u ma R.N. Suchiang. La ïoh ruh ka jingkren lyngkot shaphang ka Synjuk ki Dorbar Shnong Shangpung na u Nidayoo Papang, President ka seng. Ïa ka jingkren lyngkot shaphang ka Shangpung College la ïoh na u Rev. G.S Lytan, Adviser ka SDSS bad na u Dr. D.G. Lyngdoh Principal Shangpung College.
La ïoh ïa ka jingkren shaphang u Soso Tham na u Dr. Davidson Diengdoh Asst. Professesor Post Graduate Khasi Dept. Jaiñtia Eastern College, East Jaiñtia.
Ha kaba la pynkynmaw ia ka jingim jong u Myllung Soso Tham, ha kaba la ïathuh ba ïa u Myllung Soso Tham la kha ha u snem 1873 ha ka longïing jong u Hat Tongper na ka shnong Sohkha bad ka Lynkei Tham na Sohra, kila don 4 ngut shipara. Ia u Soso Tham la khot ruh ïa u kum u Nonghikai ha ka jaitbynriew bad ka thoh ka tar, ïa ki kot kiba ula thoh la pyndonkam ha ki kyrdan pule bapher bapher jong ki skul bad college.
U Soso Tham ula ïapoikha bad i kong Kerila Dora Gatphoh bad don 5 ngut ki khun. Hadien ka jingkhlad jong i kong Kerila u Soso Tham ula iapoikha noh bad i kong Rosamon Giri Nongrum bad um don khun hangne.
Ha ka snem 1894 ka mission kala phah ïa u Soso Tham ban wan hikai noh ha Shangpung bad ruh shipor ha Mookaiaw. U la shongthait na ka kam hikai ha ka 30 tarik u June 1931 bad ula khlad noh na kane ka pyrthei ha ka 18 tarik u December 1940, ha kaba la tep donburom ïa u ha u lum jingtep ka Balang All Saint’s Church, Shillong, Rhino Point.
La pynphuh pynphieng shuh shuh ïa kane ka prokram da ka jingrwai bad jingshad na ki khynnah skul bapher kynthup na ka Clearwater Secondary School Shangpung, ka Shangpung Presbyterian HSS, Shangpung, ka Lummuroo Secondary School, Shangpung bad na ki samla pule ka Shangpung College . Ïa ki kyntien ai khublei la ioh na u R.H Wann Secretary ka Synjuk ki Dorbar Shnong Shangpung.
