Ka Mawrynkneng Block Congress Committee ha ka 18 tarik Nohprah 2024 ka la jied ia u Samla Jonathan Syiem kum u kyrtong ban iakhun ia ka ilekshon MDC sha ka Khasi Hills Autonomous District Council (KHADC) na Sohryngkham Constituency.
Ha kane ka jingpynskhem ia u kyrtong la wan sakhi lang da u President ka MPCC u Bah Vincent H Pala, u MDC Bah Pynshngain N Syiem, u MLA u bah Ronnie V Lyngdoh ha ryngkat ka jingdon lang ki nongkitkam ka party congress na Mawrynkneng bad ki paidbah.
Haba kren ha kane ka sngi, na ka liang u samla Jonathan ula ong ,”Ka jingjied ban iakhun na ka Congress, kadei ka party kaba bat ia ka nongrim ban ioh ia ka jingsynshar laitluid”.
Ula ong ba un trei shitom na bynta ban ioh ia ka jingshaniah na ki paidbah bad u la kyntu ia ki paidbah ba kin ai ka jingkyrshan ia u ha kane ka kynti ban long kum u nongmihkhmat sha ka District Council.
Haba ai jingkren ha kane ka sngi na ka liang u bah Vincent Pala ula iaroh ia kane ka constituency kaba la sei ia u Samla Jonathan kum u kyrtong uba la nang la stad uba ladep ia ka jingpule ha ka kyrdan MBA.
Shuh shuh u la ong “Ki paibah ki lah ban shah ialam bakla hynrei ka party Congress kan nym iehnoh ia ki paidbah”
Shwa ban pynkut u la bynrap “ka Congress ka la rem ha ki elekshon MLA bad MP hynrei kan ym shong kli kti bad ha kawei ka sngi ka party Congress kan ioh ia ka jingjop”.