Ka Klob Shillong Lajong ka la mad biang ia ka nam rem kaba ar mynta ka samoi 2024-25 ha ka jingiakhun pyrshah ia ka Delhi FC na ka bynta ka wat ba 6 jong ka lympung I-League ba la pynlong da ka All India Football Federation (AIFF).
Ha katei ka jingiatynjuh bor, ka Delhi ka la ioh ban pynkhih jar nyngkong lyngba u Vanlalhriatzuala ha ka minit ba 7 hynrei lyngba ka jingiakhun kaba khlem da duh mynsiem ka Lajong ka la ioh ban pynphai noh ha ka minit ba 34 lyngba u Phrangki Buam.
Haba bteng pat ka kylla miet, ka Delhi ka la pule bha ia ka buit ialehkai jong ka Lajong na ka jingiakhun ha ka kylla step, bad ki la shim kabu ban thep kol biang lyngba u S. S. D. Binong ha ka minit ba 54 bad shi kol na u Jangra ha ka minit ba 66.
Hadien kitei ki kol (3-1), ka jingiakhun ka la long kaba khluit bad baroh arliang ki la ia pyni bor hynrei shwa ban kut ka minit ialehkai, kata ha ka minit ba 90+9, u rangialehkai ka Lajong u Gonçalves (Brazil) u la shah beh noh na madan hadien ba u la ïoh red Card na ka jingiakhun ban khanglad ia u rangthep kol ka Delhi.
Haba kut jong katei ka jingiakhun, ka Delhi ka la ioh ban kiew ha ka kyrdan ba 5 na ka jingioh 8 poiñ katba ka Lajong ka la hiar ha ka kyrdan ba 6 da ka jingioh 6 poiñ.
