Mynta ka sngi ka ophis jong u Deputy Commissioner, West Jaiñtia Hills District kala pynlong ïa ka jingïalang ha ‘Conference room’, ban pynsngew ïa ka jingïarap pisa sha ki nongrep kiba shah lynshop Phria kaba la jia haka 5 tarik u November, 2024.
Ha kane ka sngi la donlang da u MLA ka Jowai uba dei ruh u Chairman ka MUDA ma Wailadmiki Shylla, ka kong HML Kynta, Additional Deputy Commissioners, u Dr. Heimonmi Niang, BDO Thadlaskeiñ C&RD Block bad u P. Passah, BDO Namdong C&RD.
Na ka liang u ma Wailadmiki Shylla, ula pynsngew shaphang kane ka prokram kaba long shi bynta ban ai mynsiem ïa ki nongrep lyngba ka jingïarap pisa jong ka sorkar sha ki longïing kiba la shah ktah na ka jingpynjulor jong u Phria, ula pyntip ïa kane ka pisa yn sam katkum ka jingshah ktah jong ki jaka ki nongrep.
Ula pynsngew ruh ba ka sorkar kala shim ïa kane ka jingkitkhlieh na ka bynta ki nongrep ba kin ïoh ban pynbha biang ïa ka ïing jong ki, ula ong ruh ka jingïarap kaba long Rs. 4000/- tyngka ka long kaba dang duna bha, ha kajuh ka por ula kyntu ïa ki bor pynïaid District ba kin pyllait kloi ïa ka pisa sha ki nongïoh myntoi da kaba pyndep hapoh ka taïew ba ar jong u bnai January, 2025.
Ula ong ruh kito ki nongrep kiba shah pynjulor ki jingthung jingtep na u phria kin sa ïoh jingïarap pisa kaba Rs. 8500/- ha ka shi hectare, da kane ka jingpynkiew ïa ka pisa ki lah ban bteng ïa ka rep ka riang jong ki bad ïa kane ka kam ka dang shim por sa khyndiat ban phah ïa ka proposal sha ka sorkar ban ïoh ka jingmonjur.
Katba ka kong H.L Kynta, Additional Deputy Commissioner kala pyntip ba ki shnong kiba la shah ktah na u phria ki don san tylli kata ka Iongnoh, Pynthor Lynteiñ, Muphlang, Mustem bad Madan Tyrpait jong ka West Jaiñtia Hills District. Katba ki longïing kiba shah ktah ki don 113 tylli, na ka liang ka sorkar kala mang pisa Rs. 4000/- tyngka manla kawei ka longïing da kaba thep ïa ka pisa sha ki account ki nongïoh myntoi lyngba ka online bad baroh ka pisa ka long Rs. 4,52,000/- tyngka.
Shuh shuh ka kong Kynta kala pyntip ba ka tnad Agriculture kala dep ban lum jingkheiñ halor ka jingshah ktah jong u kba na ka jingwan lynshop u phria. Kala ong ruh katkum ka jinglap ka pisa baroh kaba la dep mang ka long Rs.12,40,150/- kum ka relief fund. Kane ka long ban ai jingïarap haka dor Rs 8500/- haka shi hectare da kaba thew katkum ka jingheh jong ki jaka jong ki nongrep bad kane ka kam ka dang ïaid shakhmat ban pyndep.
Na ka liang u ma P. Passah, BDO Namdong bad u Dr. Heimonmi Niang, BDO Thdlaskeiñ kila kyntu jur ïa kitei ki nongïoh myntoi ban kin leit update ïa ki bank accounts jong ki katkum ki jingdonkam jong ki Bank, khnang ban lait na ka jingsuki ban ïoh ïa katei ka pisa jingiarap.
