Ka Klob Shillong Lajong FC ka la lah ban pynjem khnap ia ka Rangdajied FC hynne ka sngi ha ka jingiakhun na ka bynta ka lympung (U21) Reliance Foundation Development League ba la pynlong da ka Reliance Foundation ha ka jingkyrshan jong ka All India Football Federation (AIFF) ha madan MFA Polo Shillong.
Ka Lajong kaba don ha ka kyrdan ba ar jong kane ka lympung ka la lah ban pynliem da kaba suk ia ka Rangdajied kaba don ha ka kyrdan ba 3, kata da 5-0 kol. Ia kitei ki 5 kol la ioh ban thep da u Emanbha, Yohan bad Mebannnangkiew.
Haba phai sha kawei pat ka jingiakhun, jong ka ki khynnah kiba hapoh 21 snem, ka North East United ka la pynliem da 2-0 kol ia ka Little Star FA lyngba ka kol u Thoiba bad Zahan.
Hadien ka wat ba 5 jong ka jingiakhun, ka North East kaba khlem pat mad ia ka nam rem mynta ka samoi ka la ioh ban khur 15 poiñ katba ka Lajong ka la ioh 12 poiñ.
