Ka Dorbar shnong Pdengshakap kaba pyniaid iaka jingialehkai football iaka ba la tip kum ka 11th Secondary School Invitation Football Knock-Out Tournament 2024-25, ha kane ka sngi saitjain 21.12.2024, ha kaba la plie pyrda iaka da u ma M. Pohsnem (SDO) PWD Amlarem Sub-Division, uba long ruh kum u kongsan ha ryngkat ka jingiadonlang u ma Oriswell Khyriem Sports Secretary, ki riew rangbah jong ka thañ bad ki nong kitkam jong ka shnong hi baroh kawei. Ha kane ka lympung la wan ban iashim bynta haduh 35 tylli ki team na ka kyllenmg ka Ri-Lum Khasi bad Jaiñtia.
Ha shwa jong ka jingialehkai ka la don ka jingialang ba lyngkot kaba la pyniaid da u S. Buam u ba long u rangbah shnong ka Pdengshakap, la ioh ruh iaka jingkren lyngkot na u S. Pakyntein uba long u Secretary shnong da kaba u iathuh ba ia kane ka Tournament la pynlong naka bynta ban kyrshan pisa iaka Pdendshakap Secondary School kaba don hapoh jong ka shnong Pdengshakap, Amlarem Sub-Division.
U kongsan haba ai jingkren u la iaroh iaki nongkitkam jong ka Tournament bad ia shnong hi baroh kawei kiba la lah ban pyniaid beit pyniaid ryntih iakane ka Tournament man la u snem naka bynta ban kyrshan pisa iaka skul kaba don hapoh shnong. Ka thong mynta u snem ka long 6 lakh ka lahduh kan ioh Rs 3,50,000 kaba ar pat 2,50,000.
Haba phai shaka jingialehkai ka KSF F.T na East Jaintia Hills kala jop iaka Nongrim Hills SSCC na East Khasi Hill da 2-1 kol, iaki kol jong ka KSF la ioh ban thep nyngkong da u Donbok Lyngdoh haka minit kaba 44 bad iaka kol ba ar pat la thep da u Phrang Pakem haka minit kaba 68. katba iaka shikol jong ka Nongrim Hills la ioh ban thep da u Gadiel Puia haka minit kaba 78.
Yn bteng iaka jingialehkai haka 28 tarik mynta u bnai por 12 baje ka Riverside Fc pyrshah iaka Kynrumlang-I FC katba haka por 2 baje nohphai sngi pat ka Synroplang FC pyrshah iaka Be My Fan.
Ha kane ka juh ka sngi la ioh ruh ban pynlait paidbah iaki ticket Lucky Draw jong ka Pdengshakap Secondary School da u kongsan ha ryngkat ki dkhot ka shnong.
