Ka Nongbah Shillong mynta ka janmiet ka la syaid da ka jingtuid ki paidbah na kylleng, kynthup na nongkyndong bad na khapsor ban wan pet na ka bynta ban pynkhreh ia ka sngi Khrismas bad ruh bad wan sakhi ia ka jingphuh bad ka jingshngaiñ ha ka Nongbah.
Ka jingpynkhreh ia ka Khrismas ka la long baroh shi bnai ha ka Nongbah ha kaba la iohi ia ka jingsnohkti ki lang ka sorkar Jylla, ki Dorbar Shnong na ka bynta ban pynphuh bad pynitynnad lyngba ka jingbuh ia ki light ha ki lynti shnong bad ha ki surok bah.
Namar ka jingkmen ban pynkhreh ia kane ka sngi kaba khraw, la sakhi ruh ia ka jingdheng ki kali naduh mynstep khamtam ha ki haiñ Khyndai-Lad, Ïew Mawlong. Ka lynti iaid kjat kum ha Police Bazar, Motphran ki la khapngiah da ka jingmareh ki briew ban iabeh ia ka por ban pyndep ia ki jingthied shwa ba ka sngi kan dum. La iohi ia ka jingkmen jong ki jingthied khamtam ka khmat ba phuh jong ki nongdie namar ba khapngiah ki dukan.
Na ka liang u Myntri Rangbah ka jylla Conrad K. Sangma, lyngba ka rynsan Social media u la ai Khublei Khrismas ia ki paidbah ka jylla ” ai ngin lehkmen ia ka Khrismas kaba shisha, kata da ka Jingieit, ka Jingsbun, ka jingmap bad ka jingsbun. Ai ba kane ka sngi ba kyrpang, kan wanrah ka jingsuk, ka jingkmen na ka bynta ki baieid jong phi. Nga ai Khublei Khrismas basuk bad ba kmen ia phi baroh. Nga shim ruh ia kane ka kabu ban ai Khublei snem thymmai kaba kyrkhu, kaba dap da ka jingsuk bad ka jingdap kyrhai ia phi baroh”.
