Ka KSU Employment Monitoring Cell ha ryngkat ka jingsynran lang ka KSU North Khasi Hills hapoh ka jingialam jong u Samla Ruben Najir ha ka 27 tarik Nohprah ka la leit iakynduh ia u Dean jong ka Central Agriculture University halor ka mat ba thmu rah ia ka jaka thoh exam sha Guwahati.
Haba kren sha ki lad pathai khubor na ka liang u Samla Ruben Najir Chairman jong ka Employment Monitoring Cell u la ong ,” kane ka post lower Division Clerk bad Upper Division Clerk la pyllait ia ka Advertisement ha u snem 2023 bad ka exam ka la dei ban long ha u bnai July 2024, hynrei na ki daw bym lah kiar ki la rah noh sha u bnai January, katkum ki admit card barim ia ki exam dei ban thoh ha Union Christian College, ha ka admit card thymmai ngi iohi ba ai jaka thoh sha Guwahati, kane ngi sngewthuh ba ka pynsuba ban pyniarap ia katto katne ki briew na kiwei ki jylla ban pynsuk ia ki ba kin thoh ia kane ka exam ban pynduh ia ki khynnah ka jylla, kumba 5000 ngut kiba apply”.
Shuh shuh u la ong, “kumno ki khynnah kin leit thoh exam sha Guwahati ka Ophis ka don hange, ka Seng ka ieng skhem beit ha ka nongrim ba ka exam ka dei ban thoh beit ha Umiam ha kane ka college lada ym lah dei ban pynbiang kum kiwei kiwei ki institute kiba ju leh man ka por, kane ka ju jia na ka por sha ka por ki central university kiba wan hangne ngi iohi ka jingjia ha NEIGHRIMS katba lait kam ki phah thoh sha Guwahati, kane ka pynjynjar ia bun ngut ki para doh para snam jong ngi ban leit thoh exam sha Guwahati khamtam kito ki ba wan na ki longïing ba duk, ban leit thoh exam sha Guwahati ka bun ka jinglut, ngi la iakren ia kita ki mat baroh bad kaba kham sngewphylla ka long ba ki briew kiba na imphal ki ioh ban thoh exam sha imphal, kiba na Tura ruh ki ioh ban thoh exam sha Tura kiba na Assam ki ioh ban thoh exam ha Guwahati, kiba dei napoh Umiam pt ki hap leit sha Guwahati kane ka don ei ei sha lyndet”.
Ka Seng ka la iakren bad u Dean kane ka jaka pule ba lada u Dean u nym lah ban pyntikna ba ki jaka thoh exam ki dei ban long bt ha Umiam lane ha shillong ma u ruh um don hok ban bat kum u Dean bad u ai daw ba ym don ka bor bad ka wan beit na u Vice Chancellor ka Imphal shiphang hadien pat u la ong ba ba u Vice Chancellor u la ai ka bor ha ki Dean baroh tang ha ki jingiakren la sngewthuh ba ki don kiei kiei kiba u Dean u ialeh ban burieh.
Shuh shuh u la ong ,”Ym dei tang kane ka mat thoh exam hynrei bun bha kane ka jaka pule ka don ki kynrum kynram thungkam thung jam hynrei ia kine kiei kiei ngin sa wanrah hadien hynrei ia kaba mynta hi ngi kwah ba kane ka exam jong ka Lower Division bad Upper Division ka dei ban long ha shillong lane ha Umiam lada ym lah ngim ailad ba kane ka exam kan long sha Guwahati, lada ki khynnah jong ngi ki leit thoh exam sha Guwahati kin nym don ba pass namar ka la don lypa ka jingiasuh buit ban thep ia ki briew jong ki na Assam ban wan trei sha kane ka jylla bad ka jylla jong ngi kam dei ka dustbin ba kiwei kiwei ki ioh ia ka Kam shane”.