Ka Klob Mawlai SC kaba ruh ka lahduh jong kane ka lympung Shillong Premier League (SPL) ha ka samoi ba lah dep ka la ioh ban khur biang sa 3 poiñ hadien ka jingjop da 1-0 pyrshah ia ka Langsning FC hynne ka janmiet (8.1.2025) ha madan SSA stadium Polo Shillong.
Ka Mawlai ka dei ruh ka kynhun kaba khlem pat mad ia ka nam rem mynta ka samoi 2024-25, kata hadien 7 tylli ki jingïalehkai. U Khrawkupar Jana uba dei ruh uwei na ki snar thep kol ka Mawlai, hynne ka sngi u la pynlah ia ka kynhun ban kiew biang sha ka kyrdan ba nyngkong mynta ka aiom lyngba ka kol ha ka minit ba 70.
Ka Langsning ka dei ka kynhun kaba khlaiñ bad paw bha 7 snem mynshwa, ka dei ruh ka kynhun kaba la ioh ban rah ia ka nam lahduh ha u snem 2017 bad 2018 hynrei mynta ka samoi kane ka kynhun ka la hiar arsut bad don ha ka kyrdan ba 9 (second last) hadien 8 tylli ki jingïalehkai.
Ka jingiakhun na ka bynta kane ka lympung kan bteng biang ha ka 11 tarik mynta u bnai ha kaba ka Rangdajied United FC kan aireng pyrshah ia ka Sawmer SC ha ka por 11:15 mynstep.