U Myntri Rangbah ka jylla u Conrad K. Sangma mynta ka sngi Thohdieng 10 tarik u Kyllalyngkot, 2025 ula wan ban plie pyrda ïa ka sngi sdang jong ka jingrakhe dap 100 snem ne ka ‘Centenary Jubilee Celebration’ ka Dorbar Shnong Chutwakhu, Jowai ha ka jingïalang bala pynlong ha madan Jrisaleiñ, Jowai.
Ha kane ka sngi la wan ban donlang da u Symbud Myntri Rangbah ka jylla u ma Sniawbhalang Dhar bad ma Wailadmiki Shylla, MLA ka thaiñ, uba dei ruh u Chairman ka MUDA kum ki symbud kongsan kiba la ai ruh ka jingïaroh kaba khraw eh ïa ka Dorbar Shnong Chutwakhu kaba la jam mynta shaduh une u mawmer ba 100, kiwei de kiba donlang ki kynthup ïa u ma Lahkmen Rymbui MLA, ki ophisar sorkar nalor kiwei de kiba la shah khot sngewbha.
Na ka liang u Conrad K. Sangma haba ai jingkren ha kane ka sngi ula pynpaw ka jingïaroh ïa ki nongïalam bad rim jong ka shnong bad kumjuh ïa kiba mynta kiba la pynïaid shakhmat ïa ki kam ki jam haduh bala poi kane ka jingdap 100 snem.
Ha ka juh ka por ula ai jingïaroh ïa kane ka shnong kaba la don bynta ha ki por ba ïakhun ïa ka kham Covid-19 da kaba synñiang jingïarap haduh 50 hajar tyngka sha ka Chief Minister’s Relief Fund.
U myntri Rangbah ula pynpaw ruh ka jingïaroh ïa ka sor Jowai kaba la iphuh iphieng bha mynta na ka jingpynkhreh ïa ka ‘Meghalaya Games’ ka ban sa long ha une u bnai, da kaba ong ha kine ki snem bala dep ki rangïalehkai na Jowai kila hap ban leit ïashim bynta kum sha Tura bad sha Shillong, hynrei ha kane ka snem kitei ki nongïalehkai na kiwei pat ki District kin ïoh lad ban wan ïalehkai sha Jowai.
Na ka liang u Myntri Rangbah ula pynher ruh ïa ka lama jong ka shnong kum ka dak jong ka jingsdang ban rakhe, da kaba pynbna paidbah bala plie ïa kane ka jingrakhe ‘Centenary Jubilee Celebration’ bad haka juh ka por ula plie pyrda ïa u maw sahnam jong kane ka jingrakhe.
Ïa ki kyntien pdiang sngewbha ha kane ka sngi la ïoh na u Waheh Shnong ma P.W Lyngdoh, ka jingduwai na u Rev. Dr. E.R Tongper, ki jingrwai pdiang na ki khun ka shnong bad la pynphuh pynphieng shuh shuh da ki jingshad pliang bad ka Choreography na ki hep rit jong ka shnong. Katba ïa ki kyntien ai khublei la ïoh na B.G. Ladia bad la pynher ïa ki 100 tylli ki Balloons da ki Senior Citizen jong ka shnong.
Ka shnong kala sam ruh ïa ki Centenary Jubilee Memonto sha baroh ki longïing hapoh ka shnong. Katba haka por 6 baje janmiet kala don ka Oldies But Goodies Concert bala shim bynta da kynhun Lynx, Theophilus, Desling Amse, Nexus bad Timeless Tunes.
Ha kane ka sngi kum ka dak ban ïarap ïaki Sports Clubs bad ki Associations napoh ka West Jaiñtia Hills District ki ban pynkhreh ïaki jingïalehkai bapher bapher ha kane ka Meghalaya Games, u Myntri Rangbah ula aiti ha u MLA ma Wailadmiki Shylla ïa ki check kaba mar 1 lak tyngka sha ki 21 tylli ki Sports Clubs bad ki Associations.
