Haba phai khyndiat shaphang ka History jong ka Dorbar Shnong Chutwakhu, Jowai ïa kane ka shnong la seng ïa ka ha ka snem 1925 hapoh ka jingïalam jong ki Rangbah bad ki Samla kum ki jong u Mr. O. H. Rease (Omil Haris Shullai), Mr. Lomiwell Shylla, Mr. Phelickstone Rymbai bad kiwei de ki Rangbah.
Ha kaba sdang ka dei tang kawei na ki Dong hapoh ka nongbah Jowai bad la tip ïa ka kum ka Dong Chutwakhu. Ka Chutwakhu ka la seng ïa ka Club ha kaba la jied ïa u ma Katmon Dome ban long u President ba nyngkong jong kata ka Club bad u la neh ha kane ka kam haduh ka snem 1938 (lait noh u snem 1930 ba la seng ïa ka Chutwakhu Society bad la thung President ïa u Woh Dabit Laloo.
Ha ka jingïalang jong ka Dong kaba la long ha ka 4 February, 1930 la seng ïa ka Society bad la pynkylla noh ïa ka Chutwakhu Club sha ka Chutwakhu Society ka ban peit bad pynïaid lang ïa ki kam ba bunjait ka dong ha ka imlang sahlang.
Katkum ka jingdawa ka kam bad khnang ba ka nym long ka jingban khia ïa ka Ophis jong ka Club bad ha ka juh ruh ka por khnang ban ailad ïa ki samla ba kin ïa shim bynta ha ki kam bapher bapher jong ka Club, naduh ka snem 1988 haduh ka snem 1999, la pynmih ruh sa kiwei ki Branch Committee kum ka Sports & Youth Affairs, Education, Vigilance, Registration, Music, Art & Culture, Counselling & Finance Committee.
Na ka bynta ka shongsuk shongsaiñ hapoh Dong poh Shnat la seng ïa ka Vigilance Committee ha ka 4.9.1992 bad kane ka Committee ka dang trei ia la kam haduh mynta.
La seng ïa ka Education Committee ha ka snem 1998 da ka jingthmu ba kane ka Committee kan peit ïa ka jingroi ha ka liang ka pule ka dangle hapoh ka Dong ka Shnat bad kumjuh ruh ban peit ia ka jingiaid shaphrang ka Lower Primary School jong ka Club.
Ha u snem 2024, katkum ki kyndon treikam jong ka District Council la donkam ban pdiang noh ia ka SANAD bad ïa ka kyrteng Chutwakhu Social Welfare Local Dorbar, Jowai la pynkylla noh sha ka Dorbar Shnong Chutwakhu, Jowai ïa kaba la tip haduh kine ki sngi.