Ka Klob Shillong Lajong ka la ioh ban wanphai bad ialehkai biang ha la ïing hynne ka janmiet hadien 2 tylli ki jingïalehkai kiba ka la hap ban ïakhun shabar jylla kiba dei ruh ki jingiakhun kiba khlem ioh ia ka jingjop. Ha ka jingioh kabu ban ïalehkai biang ha la ka Jylla (Polo Shillong), ka Lajong ka la lah ban pynliem da ka said ia ka Real Kashmir, kata da 1-0.
Ha katei ka jingiatynjuh bor, ka Lajong ka la iohpdiang ia ka jingaimynsiem ki paidbah bad khlem da pynlehnohei ia la jingkyrshan bad ka jingieit ki paidbah ia ka Lajong, kane ka klob ka la ioh ban khur ia ka jingjop lyngba ka kol u A. Ahlawat ha ka minit ba 34. Watla ka Lajong ka la duh katto katne poiñ na ka jingioh program ban ïakhun shabar jylla, hynrei la sakhi ba ki nongkyrshan kane ka kynhun ki khlem randien lane thait noh namar ka jinghiar kyrdan na ka jingduh poiñ, pynban ki la wan ban ai mynsiem Ryntih naduh ki hep barit haduh kiba la Rangbah.
Katba haba phai pat sha kawei pat ka jingiakhun, ka Inter Kashi kaba dei ruh ka kynhun kaba khlaiñ tam mynta ka samoi kaba don ruh ha ka kyrdan ba nyngkong (hadien 7 tylli ki jingïalehkai) ka la pynliem ia ka Dempo SC da 1-0 lyngba ka kol jong u J. Kauko ha ka minit ba 88.
Lyngba katei ka jingjop ka Lajong ka la kiew biang sha ka kyrdan ba 7 da ka jingioh 9 poiñ katba ka Real Kashmir ka don mynta ha ka kyrdan ba 9 ka la ïakhaid ha ka jingioh poiñ hynrei ka Lajong ka tam kyrdan noh da ka jingioh bun kol (goal difference).
Ka Shillong Lajong kan bteng biang ia ka jingiakhun ha kane ka lympung pyrshah ia ka SC Bengaluru ha ka 13 tarik mynta u bnai ha ka por 4:30 ha madan SSA stadium Polo Shillong.
