Shi bynta ban ïada ïaka jingbha jingmiat jong ka Wah Myntdu kaba la sdang ban shah pynjulor ha kiba bun rukom, naka liang ka Jaiñtia Fishing & Environment protection Association (JFE&PA) mynta ka sngi kala leit hiar khnang sha Treïongriang bad sha ki bynta ka Mulieh haka jaka ba pyntrei ïa u surok By-Pass da ka Dhar Construction Company.
Na ka liang ka kynhun kala lap baka jingpyntrei ïa une u surok kala wanrah pynban ïaka jingsahkut (Block) jong ki liar kiba tuid sha ka wah bad ki bynta jong ka Mulieh kila shah ktah jur na ka jingshah pynjulor bad kane ka la pynduh noh ïa ka jinglong barim ha ka jingitynnad ka Wah.
La pynsngew wat ïaka khyndew kaba pyllang shi jaka harud ka Wah kala buh jingma pynban ïa ki donum dohwah namar ka jingshah tyllep lut jong ki bynta ka Wah haka khyndew.
Kane ka kynhun kala lap ba ka rukom tih maw bad tih shyip harud jong ki bynta ka Wah ka dang ïai bteng haduh mynta khlem don ki jingpynrkhing na ki bor ba halor katkum ki kyndon section 144 CRPC/163 BNSS bad kane ka dang pynrit shuh shuh ïa ki bynta ka wah.
Halor kane ka Association ka dap da ka jingsngewsih kaba khraw eh, ha ka juh ka por ka buh ruh ka jingkyrpad na ka ophis u Deputy Commissioner kumjuh ka WJHD bad na ka JHADC kiba dei ban peit ïa kane ka jingeh bad kin shimkhia mardor bad ban nym ailad ïa kane jingtih shyiap pathar narud ka Wah bad ka jingthep khyndew kaba lah ban buh haka jingma ïa ka wah Myntdu.
