U MLA ka Jowai Constituency u ma Wailadmiki Shylla mynta ka sngi 11 tarik u Kyllalyngkot, 2025 ha ka jingïalang bala pynlong ha ophis ka West Jaiñtia District Sports Association (WJDSA), ula aiti ïa ki cheques sha ki 21 tylli ki Sports Clubs and Associations hapoh ka West Jaiñtia Hills District ki ban pynkhreh ïa ka 6th Meghalaya Games.
Ha kane ka sngi la ïadonlang da u District Sports Officer (DSO) ka West Jaintia Hills District ma K. Passah bad ki nongkitkam ka WJDSA ha ryngkat ki dkhot jong kitei ki Sports Clubs and Associations.
U ma Wailadmiki Shylla ha ka jingkren ula pynpaw ka jingai khublei ïa u Myntri Rangbah ka Jylla u Conrad K. Sangma halor ka jingïarap jong u ïa kane ka pisa kaba mar shilak tyngka lyngba ka Chief Minister Special Grant, ula ong kane ka long tang ka jingsdang bad ka jingai mynsiem ïa ki Sports Clubs and Associations ba kin kiew shaphrang ha ka rukom treikam.
Ha ka juh ka por u kyntu jur ïa ki Sports Clubs and Associations bad ïa ki nongshong shnong jong ka West Jaiñtia Hills baroh kawei ba kin long kiba sbun khamtam ban pdiang sngewbha ïa ki rangïalehkai kiba wan na kiwei pat ki District jong ka Jylla.
Ha kane ka Meghalaya Games kaba 6 kan kynthup ïa ki 29 tylli ki jait jingïalehkai ki ban long naduh ka 20 tarik haduh ka 25 tarik Kyllalyngkot, 2025, ha kaba ar tylli ki jingïalehkai kin long ha nongbah Shillong, ka Swimming ka ban sa pynlong ha Caroline Swimming Pool, Shillong bad ka Golf ha Assam Rifles Golf Course, Laitkor.
Ki jingïalehkai ba dang sah Archery, Arm Wrestling, Athletic, Badminton, BasketBall, Boxing, Cycling, Football, Gymnastic, Judo, Karate-Do, Kho-Kho, Muay Thai, Shooting, Softball, Sports Climbing, Table Tennis, Taekwondo, Lawn Tennis, Volleyball, weightlifting, wrestling, wushu, ki jingïalehkai tynrai kum ka Rool Ball, Yogasana bad ka Lawn Bowling yn sa pynlong ha ki jaka bapher bapher jong ka nongbah Jowai, Wahiajer bad Khliehtryshi jong ka West Jaiñtia Hills District. Ha kaba baroh ki nongïashim bynta ki long palat ne duna 3899 ngut.
