Shi bynta naka ‘National Oral Health Programme & National Tobacco Control Programme’ ka Urban Primary Health Centre Loomkyrwiang, Jowai ha ryngkat ka jingïatreilang bad ka 100 Bedded MCH Hospital Jowai ha kane ka 10 tarik u Kyllalyngkot kila pynlong ïaka Dental Awareness & Screening Camp ha kaba ki longkmie, ki longkpa lem bad ki khynnah rit kila wan ban ïashim bynta lang.
Ha kane ka prokram hashwa ban ïoh ki jingkren na ki riew shemphang jong ka tnad ka koit ka khiah, na ka liang u Daioolang Pakma, Asst. Waheh Chnong Loomkyrwiang ula ai ïa ki kyntien kiba ïadei bad ka thong jong kane ka prokram, da kaba kyntu jur ïa ki longkmie ki longkpa ba kin long kiba ïatreilang da kaba wan sha shakhmat ban shim ïa kane ka kabu bala wanrah da ka tnad sorkar jong ka tnad ka koit ka khiah hapoh ka shnong ka tnaw.
Ka Dr. P. Sohmat, BDS kala batai ïa ka rukom ban ïoh jingïada ïa ki bniat khamtam hakum kine ki sngi ba mynta, namar kiba bun na ki khynnah ki kloi bha ban ïoh ïa ka jingbam khniang ha ki bniat, kumta kala batai ïa ki khynnah kaba donkam bha ban pynkhuid ïa ki bniat manla ka sngi.
Na ka liang ka Jane Rymbai, Adolescent Counsellor Health Deaprtment kala pynsngew ba ka tnad jong ka koit ka khiah haka thong ban pynlong ïa ka imlang sahlang kaba miat ba bha bad ban lait na ki jingsniew kiba ha rukom khamtam ki jingdih pynbuaid, kala ong ka don ka bynta kaba khraw ïa ki longkmie bad ki longkpa ban wad jingtip khambniah na ki bor sorkar.
Katba ka Dr. P. Sohmat kala ai ïaka Screening Camp bad la sam ruh ïa ki Tooth brush & Tooth Paste sha baroh kiba la wan ban ïashim bynta ha kane ka prokram, na ka liang ki nongtrei ka UPHC Loomkyrwiang kala pynlong ka jingai injek bad ka jingai jinghikai Yoga ïa ki khynnah.
