Ka Klob Shillong Lajong FC ka ioh Nongrim bad ioh mynsiem shibun na ka jingioh kabu ban ïalehkai ha la ïing ha kane ka sngi ha kaba ka la lah ban pynjem khnap ia ka FC Bengaluru da kaba thep 5 kol la 0 ha ka jingiakhun na ka bynta ka lympung I-League ba la pynlong da ka AIFF ha madan SSA stadium Polo Shillong.
Hadien ba la ioh ban wanphai sha la ïing, baroh 2 tylli ki jingialehkai ka Lajong ka la ioh ia ka jingjop don burom. 2 ngut ki rangialehkai ka Brazil mynta ka sngi ki la lah ban ïalehkai bha, kynthup ia u Gonçalves uba la pynkhih jar nyngkong ha ka minit ba 40 bad u Douglas Tardin uba la thep 3 kol, kata ha ka minit ba 60,67 bad 75. Katba ia ka shi kol la ioh ban thep da u rangialehkai Khasi, u Figo Syndai ha ka minit ba 45+2.
Lyngba katei ka jingjop kaba la pynkiew ia ka Lajong sha ka kyrdan ba 4, ki paidbah ieit phutbol ka Jylla ki angnud ba ka All India Football Federation kan iai bteng bad ailad ban pynlong ia ki jingialehkai I-League na ka bynta ka Lajong ha ka Nongbah Shillong.
Hadien 8 tylli ki jingïalehkai ka Lajong ka la ioh 12 poiñ katba ka Bengaluru ka dang neh 5 poiñ hadien 8 tylli ki jingïalehkai. Ka Churchill Brothers kaba don don ha ka kyrdan ba nyngkong ka tam satang 4 poiñ ia ka Lajong bad lada kane ka kynhun kan liem ha ka Delhi ha ka 17 tarik mynta u bnai, ka Lajong kan ioh kabu shibun ban knieh ia ka kyrdan ba nyngkong lada kan iai bteng ban khur jingjop.