Ka Synjuk ki Rangbah Kur ka Bri Hynniewtrep ha ka 15 tarik Kyllalyngkot 2025 ka la pyntip paidbah sha ki lad pathai khubor ha ka 18 tarik Kyllalyngkot kan don ka Dorbar iktiar paidbah jong ka Khasi Hills Autonomous District Council.
Haba kren sha ki lad pathai khubor na ka liang U Bah Erwin Sutnga u la ong kane ka Dorbar kan pynkupbor ia ki paidbah lyngba ki ain jong ka District Council.
Kawei ka dei ka Khasi Hills Autonomous District Council Administration of Elaka Amendment 2023 bad ka Khasi Hills Autonomous District Khasi Social Customs of Village Amendment Act 2023 ha kitei ki aiñ ki aibor ia ki Rangbah Dong, Seng Kynthei bad ki Seng Samla ha kane kawei pat ka pynkupbor ia ki Rangbah Shnong.
Kane ka dei ka sien kaba nyngkong ha ka Khasi Hills Autonomous District council, kino kino ki council kiba don hangne ka Jaintia ka Garo kaba kane ka state ba la buh da ka Constitution jong ka Ri India ki la thaw ia kine ki aiñ ki la bsuh ia kine ki kyndon jong ki aiñ ban kren shai kdar ia ki bor jong ki Seng kynthei, Seng longkmie bad Seng Samla bad khamtam eh ia ki Rangbah Dong.
Ha kane ka 18 tarik Kyllalyngkot ka jingkyrpad ia ki paidbah ba ki dei ban poi sha ka jingiakynduh lang jong ka Jaitbynriew kaba don ha ki thaiñ Khasi hapoh ka jingsynshar jong ki District Council ba ki Kur, ki Seng longkmie, Seng Samla bad ki Shnong kin ia wan lang ha ha ka nongrim jong ka Jaitbynriew.
Na ka liang u R L Blah Secretary jong ka Synjuk Nonsynshar shnong u la ong ngi sngewnguh ia ka District Council hadien 72 snem ha kane ka kynti ba mynta la ioh ban wanrah bad pyntreikam ia 2 tylli ki aiñ ka Khasi Hills Autonomous District Administration of Elaka 2023 bad ka Khasi Hills Autonomous District Khasi Social Customs of Village Amendment 2023.
Ka Dorbar bah ba khatduh ka dei ha u Snem 2015 ha madan Polo ba la pynlong da ka Synjuk ki Nongsynshar Shnong ha ka Bri Hynniewtrep hadien ka jingsloit noh jong u Nongbishar Justice SR Sen ia ka iktiar jong ki Rangbah Shnong ki Dorbar shnong.
Shuh shuh u la ong ka Synjuk Nongsynshar Shnong ka Bri Hynniewtrep ka khmih lynti ia u paid Khasi hapoh ka jingpeit jong ka Khasi Hills Autonomous District Council ban ia mih paidbah ha ka 18 tarik Kyllalyngkot sngi saitjain ban ia poi ha ka por 10 baje ha madan na ki Kur bapher bapher, ki Dorbar Shnong khamtam ka dei ka sien kaba nyngkong eh baroh shi kata ki Dorbar shnong ki ithuh tang ia ki Rangbah Shnong ha kane ka kynti ba mynta kin ithuh ruh ia ki Rangbah Dong, pynkupbor ruh ia ki Seng longkmie bad ki Seng Samla hapoh ka shatri jong ka Dorbar shnong.