Ka Jaiñtia National Council (JNC) Central Executive Committee kum shi bynta ban sdang ïa ka “Save Jaiñtia Mission” kaba la dep pynbna paidbah halor ki 5 tylli ki mat jingdawa na ka bynta ka Ri-Lum Jaiñtia.
Kine ki mat ki kynthup 1. ban pynkhlaiñ ïa ka JHADC, 2. ban dawa pynrung ïaka ktien Jaiñtia haka State Launguage Act ka jylla, ban pynrung ruh haka jingrwai Anthem ka Jylla, 3. ban dawa pynshna noh ïaka Policy thymmai ne ka rukom thungkam thung jam haki karkhana dew bilat, 4. ban dawa pynbeit noh ïa u pud u sam hapdeng ka Jaiñtia Hills bad ka Assam da kaba pynshong nongrim ïa ka PRE 1951 Jaiñtia Hills Map bad kaba khatduh bad ba 5. ban dawa pynshna noh ïa ka Small Scale Coal Mining Policy.
Ïa kane ka save Jaiñtia Mission ka seng kala sdang ban ïaid lynti naduh mynta ka sngi 15 tarik u Kyllalyngkot, 2025 ban ai jingpynshai sha u paidbah halor ka jingdonkam jong kitei ki mat, kiba ka seng kala thaw khnang ïa kane ka mission.
Na ka liang ki nongkren ha kane ka sngi kiba kynthup ïa kiwei de ki sengbhalang kata naduh u Hamehi Bamon na ka Western Zone ka JNC, u Nangjan Dkhar Vice-President JNC-CEC, u Neil Mukhim Acting General Secretary ka JSU, u Heihok Sapoh President ka JSM-WR, U Wanshan Suting General Secretary ka JNC bad u President rangbah ka seng u Sambor Lyngdoh.
Baroh kitei kiba ai jingkren haka jingïalang kila ban jur halor ka jingdonkam ban pyntreikam ïa kitei ki san tylli ki mat jingdawa kiba donkam kyrkieh mynta ïa ka Ri-Lum Jaiñtia hi baroh kawei. Ha ka juh ka por kin long ruh ki lad jingïada ne ka stieh ïa ka pateng jong ki khun ka Ri Jaiñtia.
Shuh shuh kila kynthoh jur halor ka jingtlot treikam jong ka District Council bad kumjuh ïa ka sorkar jylla lyngba ki nongmihkhmat kiba kynthup naduh ki MDC bad MLA ïa kiba ki paidbah nongshong shnong kila dep ban pynjop don burom, hynrei kala long pat da khongpong haba sakhi ïa ki rukom treikam jong ki ba kynthoh jur kitei ki nongkren.
Ïa ka jingïalang bala pynlong ha Iawmusiang Stand Ummulong la pynïaid da u Publicity Secretary sengkmie u bah Mebanteilang Sukhlaiñ, haka juh ka por la pyntip ba kane ka Save Jaiñtia Mission kan dang ïaibteng sha kiwei de ki shnong kiba hap hapoh ka Ri-Lum Jaiñtia.
