-Yn rwai ha ka Meghalaya Games 2025-
U Myntri Rangbah ka jylla Conrad K. Sangma hynne ka sngi u la pyntip paidbah ba ha ka jingrwai State Anthem la rai ban pynrung ruh ia ka ktien Pnar ha kaba yn sa thep ruh khyndiat laiñ ha katei ka Anthem kaba yn rwai nyngkong ha ka Meghalaya Games ka ban long ha Wahiajer West Jaintia Hills.
U MR u la pynshai ruh ba katei ka rai ka la wan hadien ba la don ka jingtyrwa na Rilum Jaintia bad ka committee ka la sngewdei ban kynthup lang na ka bynta ka jingiatylli. Nalor katei, u Conrad u la iathuh ruh ba ha ka jingialang bad ki Myntri sorkar la rai ban thaw ia ka committee na ka bynta ban sam khusnam lyngba ka tnad Arts and Culture sha ki ‘riew don sap bad kiba pynneh ia ka tynrai kum ha ka put ka tem, ka rwai ka siaw, ka suh ka thaiñ, ka shad tynrai bad kiwei kiwei.