Ka Mawthaw Youth Sport & Cultural Club ka la ioh ban rah ia ka nam lahduh jong ka lympung phutbol ba la pyniaid da ka Rambrai Youth Sport & Cultural Organisation kaba dei ruh ka lympung ba la pynlong da kane ka sport Club ha ka sien kaba 8. Ha katei ka jingiakhun phainal ba la pynlong ha madan Rambrai West Khasi Hills, ka Mawthaw ka la pynliem da 2-0 ia ka Rambrai YSC &CO.
U Bah Kimfa Marbaniang, MLA barim ka Rambrai Jyrngam Consituency u la long kum u kongsan ha katei ka jingiaknieh nam lahduh ryngkat ka jingsynran u Sordar ka Shnong Rambrai, ki riew rangbah ka shnong bad kiwei kiwei.
Ka jingiakhun phainal ka long kaba itynnad bad kaba la pynshohbiej shisha ia ki nongwanpeitkai. Lah ban ong ruh ba kadei ka jingiakhun kaba jwat tam bad kaba pynkhih shisha ia ka mynsiem jong ki nongkyrshan. La sakhi ia ka jingrisa, ka jingkyrhoi bad ka jingaimynsiem jong ki paidbah ia ki nongialehkai.
Ka Mawthaw ka la ioh ban pynkhih jar nyngkong lyngba u Teikupar Sangriang ha ka minit ba 20 lyngba ka jingiarap buh bol (assist) jong u Kyrshan Sangriang. Hadien katei ka kol, la sakhi ba ka jingialehkai ka la kham khluit shuh shuh bad ka rangialehkai ka Rambrai ki la iakhun dohiap ban pynphai ia katei ka kol ha ka kylla step hynrei namar ka jingskhem ki rangialehkai dien (defender) ka Mawthaw, la khanglad noh ia ka jingthmu jong ki.
Katba ka jingiakhun ka dang bteng, ka Mawthaw ka la ioh sa kawei pat ka kabu ban thep kol lyngba u Kitboklang Marwein ha ka minit ba 50, bad lah ban ong ba lyngba katei ka kol la pynskhem bad pyntikna ba ka Mawthaw kan ioh ia ka jingjop ha kane ka sngi.
Ia ka khusnam Player of the Tournament la ioh ban khur da u Shankupar Sangriang, ia ka khusnam Best Goalkeeper la khur da u Dingles Sangriang bad ia ka khusnam Top Scorer la khur da u Kitborlang Marwein uba la ioh 5 kol ha kane ka lymung baroh kawei.
