U ma Khroo Lamsalanki Pariat uwei na ki samla rangbah na nongbah Jowai ba shong ba sah ha Tympang Iawmusiang Jowai mynta ka sngi da kawei ka jingmut ula shim ia ka rai ban iakhun ha kane ka elekshon MDC sha ka JHADC ka ban sa long ha ka 21 tarik February 2025.
Katkum ka jingiathuh jong ma Khroo sha ki lad pathai khubor ula ong ba ka por ka la biang ia u ban shim ia kane ka jingkitkhlieh ban shakri paidbah ban iakhun kum u kyrtong shimet (Independent Candidate), na ka 17 Jowai North Constituency.
Ki jingthmu kiba ha khmat eh jong u ban trei haba u poi sha ka thong ki kynthup ia ka jingpynbha ia ka riti ka dustur (ka shongkha shongman bad ka hiar pateng), ban pynskhem ia ka jinglong trai ri trai muluk, ban pynskhem ia ka khyndew ka shyiap, ki um ki wah, ka khih ka kamai, ban pynkiew ia ka stad ka tip nalor kiwei de.
U ma Khroo u ong ba ki don ki party heh ba kynthup ia ka Congress bad ka BJP kiba la khot ia u ban iakhun na ka tiket jong ki, hynrei u kyntait, namar ba u kwah ban ieng da ka mon jong ki paidbah.
U ma Khroo ula khot bad kyntu ia ki paidbah jong ka Jowai North Constituency bad ki nongshong shnong ka ri lum Jaiñtia ban long kiba stad ban jied ia ki nongmihkhmat kiba don ka jingkitkhlieh ia ka ri bad ka jaitbynriew.
Kum ban shu pynkynmaw ba u ne u samla rangbah (Khroo Pariat) u don bynta ban trei ha ki kam paidbah bad ha ka imlang ka sahlang. U long u nongialam jong ki nongtrei Muster Roll, ki nongbylla sngi, kynthup ia ki Mid Day Meal Cook jong ki skul bapher bapher, u long u nongialam ba hakhmat ha ka jingiadei bad ka jingwanrah ia ka khuid ka jngiar jong ka wah Myntdu, kumjuh ka jingpynbor ia ka JHADC ban don ka jingithuh noh ia ki Kur bapher bapher kiba don hapoh u pud u sam jong ka.