U Symbud Myntri Rangbah ka sorkar jylla u ma Sniawbhalang Dhar ula wan ban plie paidbah ïaka Building ba thymmai ka CTC Orchid INN (MTDC) ha Thadlaskeiñ Mukhla, West Jaiñtia Hills District ka don haduh 16 tylli ki kamra sah bad ïa kane Building la dei trai da u ma S.K Lato uba dei u Chairman ka Orchid.
Na ka liang u ma S.K. Lato haba ai ka jingkren lyngkot shaphang jingïaidlynti jong ka Orchid INN kata naduh u snem 2003 kaba ula shimti ïa ka Building na ka sorkar bad ha kata ka por kala long tang kum ka sem mrad khlem don ki nongpeit nongsumar, kumta ula sdang ban pynshna thymmai da ka jingïohi jngai ba ka kam shangkai hapoh ka Ri-Lum Jaiñtia kan kiew ha ki sngi ban wan.
U ma Lato ula pynpaw ka sngewnguh khamtam eh ïa kito ki nongïalam shnong ka Mukhla bad kiba la khlad na kane ka pyrthei, kiba la shah ïa u ban shna pynbha ïa ka Nan Thadlaskeiñ la 20 snem tam mynta bad kumjuh ïa ka jaka ba shna ïa kane ka Orchid INN.
Ban pynkiew ïa ka jylla haka ïoh ka kot “donkam ka jingïasngewthuh jingmut lang haba trei ïa kano kano ka kam ba bha”, la ong ma S.K Lato, kumta u kyntu jur ïa ka sorkar ba kan pynkiew ïa ka kam jngohkai pyrthei hapoh ka jylla namar ka jylla kala don lypa ha ka jingriew spah jong ka mei mariang naduh ki lum ki wah bad ki khlaw ki btab. Lyngba ka kam jngohkai pyrthei kan kyntiew kumjuh ïa ka ïoh ka kot bad ka jingïoh kam ïoh jam ïa ki khun samla.
Naka liang u ma Sniawbhalang Dhar kum u symbud kongsan haba ai jingkren ula ong kane ka sngi kan pyndap da ka jingkmen ïa ki nongshnong shnong ka Ri-Lum Jaiñtia, da kaba ong ïaka jingtei kaba dang ïaid shait shait mynta ïaka Tourism Convention Center kaba don harud ka pung Thadlaskeiñ kan pynbiang nadong shadong ïa ki jingdonkam (facilities) na ka bynta ki nongwan jngohkai pyrthei.
Shuh shuh ula ong kane ka Tourism Convention Center kaba la mang ban pyntrei haduh kumba 35 klur tyngka kan ïarap shibun eh ïa ki nongwan jngohkai shapoh ka Ri-Lum Jaiñtia ha kaba kim donkam shuh ban leit sha Shillong naka bynta ka jaka sah bad ka bam ka dih jong ki.
Ula pynkymmaw ha ki por mynshwa kiba bun ki nongshong shnong ka Ri-Lum Jaiñtia ki dang pylleit jingmut haka kam tih bad shalan dewïong, hynrei mynta kila peit khmat sha ka kam shangkai pyrthei (Tourism) namar ïa ka nongbha Shillong la tip mynta kum ka No-1 destination ha ka kam jngohkai pyrthei, u kyrmen ba ka Ri-lum Jaiñtia kan long kaba ar ha kine ki snem ba wan.
U ma Dhar ula pynsngew ruh halor ka budget kaba heh duh bala mang khnang sha ka tnad Tourism khamtam ban shna ïa ki resort ha kylleng ki jaka kaba la mang pisa da ka sorkar haduh 500 klur eiei. Ula pyntip ha kine ki 2 snem ban wan yn pynheh noh ïa ka kad liengsuiñ ha Umroi kaba lah ban hiar ki liengsuiñ heh.
Ha ka juh ka por ula pynsngew ïa ki kam pynroi bapher bapher kiba yn sa wanrah hapoh ka Ri-Lum Jaiñtia bad ha ka jylla hi baroh kawei hapoh kine ki snem ba ka sorkar MDA ka ïoh ban synshar.
Na ka liang u ma Wailadmiki Shylla ula pynsngew ba shen ka sorkar kan wahrah ïa ki Luxury Resort kumba lai ne saw tylli ha Mukhla bad kane kan dang pynsuk shuh shuh ïa ki briew ba nabar ban wan shangkai pyngngad. Ula ai khublei ruh ïa u ma S.K Lato ula la trei shitom ban pynlong ïa ka CTC Orchid INN kumba ka long mynta bad u long u briew uba dang bteng ïa ki kam ba bha hapoh ka imlang ka sahlang.
Kiwei de kiba ïsdon lang ha kane ka sngi ki kynthup ïa u ma Alan West Kharkongor, President ka MRTF & MTDC Director (board member), u bah P.F. Tariang Asst. Director ka tnad Tourism ka jylla, u ma M.S Lhuid IAS (Retd), u Ashish Yadav Chairman ka Meghalaya Rural Bank, ki MDC bad kiwei de ki nongshah khot sngewbha nalor kiba ha ïing u ma Lato.
Ïa ka jingïalang la pynlong ha phyllaw katei ka CTC Orchid INN ha ka jingpynïaid u ma S.K Lato, la ïoh ki kyntien pdiang sngewbha na ka Osakapaia Challam, katba ïa ki kyntien ai khublei la ïoh na ka kong Wansaka Challam kaba dei ka Executive Director, Orchid Inn.
