U Myntri Rangbah ka sorkar Jylla Conrad K. Sangma ha ka 21 tarik Kyllalyngkot ula pyllait haduh T.40 klur tyngka na ka bhah khajna u dewïong sha ka Jaiñtia Hils Autonomous District Council (JHADC).
Ïa kane ka sanction order ula aiti ha u Chief Executive Member JHADC ma Thombor Shiwat haka jingleit ïuhkjat kaba nyngkong eh ka jong u ïaka ophis treikam jong ka konsil hadien ka prokram Meghalaya Day kaba long ha District Library Auditorium, Jowai.
Ha kane ka sngi la ïadonlang ki ar ngut ki Symbud myntri rangbah u bah Prestone Tynsong, u ma Sniawbhalang Dhar, ki myntri sorkar ba kynthup ïa u ma Comingone Ymbon, u A.T Mondal, MLA Jowai Wailadmiki Shylla nalor ki dkhot Executive Committee ka Konsil.
Na ka liang u ma CEM Thombor Shiwat ula pynpaw ka jingsngewnguh ïa u Myntri Rangbah Conrad K. Sangma uba la shimkhia ban pyllait ïa kane ka bhah khajna na ka bynta ba ka konsil khnang ban ïoh siew ïaka tulop jong ki nongtrei kaba la kynjoh sha ka 12 bnai naduh u Lber 2024.
U Ma Thombor ula khublei ruh kumjuh ïa ki ar ngut ki Symbud Myntri Rangbah bad u MLA kiba la shimkhia ban ïasaid na ka bynta ban pyllait ïa kane ka bhah khajna ka konsil ban pynjem ïaka jingeh ki nongtrei jong ka konsil baroh kawei.
