Ha ka sngi sdang jong ka jingthep Kyrteng na ka bynta ban iakhun ia ka election MDC ka ban long ha ka 21 Tarik u Rymphang 2025, u Kyrtong ban iakhun na Sohryngkham Constituency u Dr. O S Jyrwa u la wan ban thep kyrteng ialade kum u Kyrtong shimet (Independent) ha ka 27 tarik u Kyllalyngkot 2025 ha khmat ka returning officers ha DC office ka Smti M Lakiang MCS, Additional Deputy commissioner.
Hadien ba pyndep ia katei ka jingthep kyrteng bad ka jingsmai hakhmat ka RO, u Dr. Jyrwa u la ong ba ka jingmih jong u sha khmat ban iakhun ia ka election MDC ka dei hadien ba ki paidbah ka constituency ki ai ka jingshaniah bad ki la pynkhih ia u ba u dei ban mih sha khmat ban shim ia ka lyngkor bad ia ka jingeh ki paidbah namar ha ki snem ba lah leit noh u la iakhun teng ha ki election MLA na Mawryngkneng hynrei um shym poi sha ka thong, bad ha kane ka kynti ba mynta u khmih lynti ban ioh ia ka jingjop da ka jingkyrshan ki paidbah.
Haba kylli na kaei ka Nongrim bad ka jingthmu ba u la rai ban ïakhun biang ia ka Elekshon, u Dr. Jyrwa u la ong “Ka thong jong nga hi ka long ban iada ia ka riti synshar u Khasi, ban pynneh pynsah ia ka khyndew u shyiap, ka 6th Schedule bad kaba kham ktah ia ka constituency jong ngi hi kadei ka by-laws jong ka District Council”.