Ka Laitkor SC kaba don mynta ha ka kyrdan ba 4 jong ka lympung Shillong Premier League (SPL) 2024-25, ka la ioh ban mad biang ia ka jingjop mynta u snem hadien ba ka la lah ban pynliem da 2-1 ia ka Sawmer SC kaba don mynta ha ka kyrdan ba 8 jong kane ka lympung.
Naduh ba sdang ka kylla step, ka jingiakhun ka la long kaba shongshit, baroh 2 kynhun ki la ïakhun na ka bynta ban ioh ia ka jingjop hynrei ha ka jingïalehkai, ka don ka jingjop bad ka jingrem ka don ka jingaimynsiem, ka jingmyntoi bad ka jinghikai na ka jingmad ia ka nam rem ruh. Ka long kumta ruh ha kane ka sngi, watla ka jingiakhun ka long kaba iakhaid bor hynrei ka Laitkor ka la ioh ia ka jingjop lyngba ki 2 kol ba la thep da u Samborwell Mynsong ha ka minit ba 5 bad 18. Ka Sawmer ka khlem randien watla ka la shah thep 2 kol tang hapoh 18 minit bad ha shwa ban kut ka kylla step ka la ioh ban pynphai shi kol lyngba u Shanmeiaki Warlarpih ha ka minit ba 32.
Haba bteng ka kylla miet, ka jingiakhun ka la kham skhem khamtam ki bynta ba hadien jong ka Sawmer bad baroh 2 kynhun ki khlem ioh shuh ban pynkhih jar haduh ban da kut ka minit ialehkai.
Lyngba katei ka jingjop ka Laitkor ka la ioh ban knieh ia ka kyrdan na ka Nangkiew Irat kaba la ioh 15 poiñ na 10 sien ki jingiakhun katba ka Sawmer ka la neh mynta ha kajuh ka kyrdan (8) hadien ka jingioh 11 poiñ na 11 sien ki jingialehkai mynta ka samoi.
Ka jingiakhun kan bteng biang lashai ka sngi ka 29 Kyllalyngkot 2025 ha kaba ka Langsning FC kan iakhun pyrshah ia ka Ryntih FC ha ka por 2:30 janmiet ha madan SSA stadium Polo Shillong.