Mynta ka sngi ka 29 Tarik Kyllalyngkot 2025, ka seng VPP ne kata ka seng ia kaba la tip kum ka seng ‘Prah’ ki la wan ban thep kyrteng na ka bynta ban ïakhun ia ka Elekshon MDC ha khmat ka returning officer ha DC office ka Kong M. Lakiang MCS, Additional Deputy Commissioner, Shillong.
Kitei ki kyrtong ki kynthup ia u Bah Winston Tony Lyngdoh na Nongthymmai, Bah Eddison Kharumnuid na Mawlai, Bah Kitbor Syiem na Nongkrem, Bah Strong Pillar Kharjana na Mawkhar-Pynthorumkhrah, Bah Denzil Chen na Jaiaw, Bah Lancaster Marbaniang na Mawphlang, ka Kong Aibandaplin Lyngdoh Nonglait na Mylliem, Bah Seibor Warbah na Mawkynrew bad u Bah Danny Langstien na Laban.
Kum ban shu pynkynmaw, ka Kong Aibandaplin Lyngdoh Nonglait ka la dep ban ïakhun ia ka Elekshon MDC na Mylliem ha u snem 2023 bad ka la liem noh da ka said ha u kyrtong ka Congress, Bah Ronnie V.Lyngdoh.
Haba kylli, ia ka daw bad ka thong jong ka ban ïakhun ia kane ka Elekshon KHADC ka la jubab “ka synshar khadar ha ka jylla jong ngi ka donkam ia ka jingkylla bad kata hi kadei ka thong jong ngi ban wanrah ia ka jingsynshar kaba khuid bad kaba hok” ong ka Aibandaplin. Ka la ong ruh ba lada peit sawdong ki jaka la ka long ha Khasi, Jaiñtia la iohi ia ka jingphai khmat ki paidbah sha u Prah bad ka la pynpaw ruh da ka jingtikna ba kane ka daw ba la pynlong ba kan mih sha khmat ha kane ka Elekshon. “Ngi mih na ka party ba baroh ki paidbah ki pdiang” la pynkut ka Kong Aiban.
