U kyrtong ka VPP na War Central u ma Jamshaphrang Pohtam ula pynshai sha ki paidbah nongkyrshan jong ki lai tylli ki Constituency ka War Jaiñtia ba ka party kan nym leh kumba leh kiwei ki party ha ka rukom leit Canvas. “Ngin nym ïalam briew sha kiwei pat ki shnong haba pynlong ïa ki jingïalang tang u Kyrtong lem bad ki katto katne ngut ki nongbud ngin leit Canvas sha ki shnong briew hapoh ka thaiñ War Jaiñtia kumba long ha ki por Election MP”.
U kyntu ïa ki paidbah ba kin nym sheptieng ne duh mynsiem ïa kane ka rukom leit Canvas ka Party, hynrei ki nongkyrshan ki dei ban sngewskhem ban nym shah ïalam bakla, namar ka jingjop kan sa wan hi hadien ka jingñiew vote.
Kum ka Party kan nym pynshlur ïa ka jingkhawai dawai khnang ban pynduna ïa ka jinglut jingsep bad ka party ka pynrem jur ïa ka rukom sam pisa na kino kino ki riew rangbah kiba thmu ban leh ïa kane, namar kane ‘ka pisa ba shim ha ka por Election ka dei ka pisa jong ka jingtim ïa ka lashai’ ong u Jamshaphrang Pohtam.
Ula kyntu ïa baroh ki paidbah to ai ba ka burom U Blei kan paw ha kane ka Election da kaba ‘ngin jied ïa u kyrtong halor ka hok bad ka jingshisha, jied ïa ka lynti kaba dei bad kyntait ïa ka bym dei, kampher lada ym don ka kyrdan pule hynrei ngin jied da ka jingstad ba kynjamynsiem’ la pynkut u ma Pohtam.