U Bah Pius Marwein u ba dei ruh u MDC na 26 Langrin Constituency bad MLA ka Ranikor Constituency u la pyndep hynne ka sngi ban thep kyrteng na ka bynta ban ïakhun biang ia kane ka Elekshon ka ban sa long ha ka 21 tarik Rymphang 2025 ha ryngkat ki dkhot bad Nongïalam ka UDP ha Mawkyrwat South West Khasi Hills District.
Kum ban shu pynkynmaw, u Bah Pius u la sdang ia ka jingiaid lynti ha kane ka saiñ hima naduh u snem 2018 ha kaba u la sdang ban ïakhun ia ka shuki MLA pyrshah ia u M.M.Danggo hynrei liem noh ha utei u kyrtong na Congress. Hadien ka jingmih noh u Danggo ha katei hi ka snem ban leit pyniasoh sha ka Seng NPP, u Bah Pius u la shim ia ka kabu ban ïakhun biang ia katei ka Elekshon Shiteng samoi bad da ka jingshaniah jong ki paidbah u la ioh ia ka jingjop pyrshah ia u Danggo uba la synshar haduh 20 snem ha Ranikor Constituency.
Namar ka jingshaniah u Paidbah ia u briew uba dei hi na la ka thaiñ, (u dei uba la kha bad la heh la san ha ka shnong Nonghyllam, hajan Shnong Ranikor) u la iai bteng ban shakri hok ia u Paidbah haduh une u snem bad haduh kane ka kynti ruh u don ia ka jingsngewshlur ban ïakhun biang.
Na ka liang u Bah Marwein u la ong ba ki paidbah ki dang shaniah ia u namar ki iohi ruh ia ki soh jong u kum u Nongïalam. U la kren ruh da ka jingtikna ba un jop biang ia kane ka jingiakhun da kaba suk. “Ka jingkyrmen lei lei ka long 100 na ka 100. Balei ba nga ong kumta, namar nga iohi ba ki paidbah bad ki nongkyrshan ki iai don ryngkat ha kane ka Elekshon, nga iohi ruh ba ki nongkyrshan ki dang skhem jingmut”.
Nalor kata u Bah Pius la pynskan ruh na ka bynta ka seng UDP ba ha ki 4 snem ba la ialam da ka seng UDP ha KHADC, la sakhi bad paw ki kam pynroi bad u la kam ruh ba ym pat ju iohi ne don kiba la leh ne lah kumba la lah ka UDP ha kitei ki snem.
